Impaganetget ni Presidente Ferdinand R. Marcos Jr. ti nasken a panagsagana ti Filipinas kadagiti lumanlanlan a pangta manipud iti ruar ti pagilian, a gapuanan ti immirteng a risiris iti Indo-Pasipiko a rehion.
Iti isasarungkarna iti 5th Infantry Division ti Philippine Army (PA) iti Camp Melchor dela Cruz iti Gamu, Isabela itay Hunio 10, 2024, kinuna ni Presidente Marcos a gapu iti kinaasideg ti Filipinas iti Taiwan, addan interes ti China iti Filipinas, isu a nasken a sisasagana ti amianan a paset ti Filipinas iti ania man a mapasamak.
Inlawlawag ni Presidente Marcos a nupay saan a mangamkamkam ti Filipinas iti ania man a teritorio, nasken a mapabaro ti kapanunotan dagiti mangidaulo ken maipakomit kadakuada ti panangsalaknib iti teritorio ti pagilian.
Innayon pay ni Marcos a masapul a pagtalinaeden ti gobierno nasional ti talna iti rehion babaen ti diplomasia.
COC ni Doc Willie Ong a para senador, impila ti asawana
Ket gapu iti ilulutuad dagiti baro a pangta, inkeddeng ti gobierno nga iraman ti Cagayan a kas maysa nga Enhanced Defense Cooperation Agreement (EDCA) site, babaen ti pannakitinnulong iti Estados Unidos.
Sakupen ti Joint Task Force (JTF) Tala ti paset dagiti rehion ti Ilocos ken Cagayan Valley agraman ti entero a Cordillera Administrative Region (CAR), a mangidadaulo iti 501st, 502nd, ken 503rd Infantry Brigade (IB), Joint Task Group Baguio, Philippine Air Force (PAF) Tactical Operations Group 1, ken Tactical Operations Group 2.
Iti agdama, maibilang latta a pangta iti uneg ti pagilian dagiti grupo nga Ilocos-Cordillera Regional Committee (ICRC) ken Komiteng Rehiyon Cagayan Valley (KRCV). (Betheena Unite/Manila Bulletin//Lito Hilidon/Bannawag)
