Mapan a 30,000 a katao ti dimmar-ay iti "Parada ng Kalayaan 2024" iti Quirino Grandstand itay Hunio12, 2024 a kas pangrambak iti maika-126 a tawen ti Aldaw ti Wayawaya (Independence Day) ti Filipinas.
Naagapad ita a tawen ti tema a: “Kalayaan. Kinabukasan. Kasaysayan,”kas panangbigbig iti tawid dagiti Filipino iti anag ti panagwayawaya ken panagkaykaysa.
Kangrunaan a dimmar-ay ni Presidente Ferdinand R. Marcos, Jr. kaduana ni First Lady Liza Araneta-Marcos ken dagiti annakda a da Ilocos Norte First District Representative Sandro Marcos, Vinny Marcos, ken Simon Marcos. Nakidanggay met ni Siudad ti Manila Mayor Honey Lacuna-Pangan ken dagiti opisial ti lokal ken nasional a gobierno.
Nagparada dagiti 22 a naarkosan a karosa manipud kadagiti nadumaduma a probinsia ken nailian nga ahensia ti gobierno, a mangitampok iti historia ti Filipinas.
COC ni Doc Willie Ong a para senador, impila ti asawana
Imparang dagiti float ti 11 a pakasaritaan iti pannakailapsut ti pagilian kadagiti nangsakup a ganggannaet a kas iti "Cry of Candon" iti Ilocos Sur; "Tres de Abril Revolt" iti Cebu; "Battle of Alapan, ti umuna a pannakayaplag ti bandera ti Filipinas ken Proklamasion iti Wayawaya; pannakaipasdek ti Comite Central Filipino; ti "Cinco de Noviembre Revolt" ken pannakaipasdek ti Negros Republic; ti "Cry of Santa Barbara" ken pannakaipasdek ti Federal State ti Visayas iti Iloilo; umuna a pannakaibayog ti bandera ti Filipinas iti Mindanao; ti "Siege of Fort Pilar" iti Zamboanga; ti pannakaakas ti bandera ti España iti Jolo, Sulu; panaggibus ti Siege of Baler; ken ti pannakaipasdek iti Malolos Congress ken umuna a Republika ti Filipinas.
Naitampok iti parada ti float nga "Inang Bayan" a dinisenio ni Diego Imao.
Isimsimbolo ti Inang Bayan ti Filipinas ken dagiti tallo nga annakna a da: Luzon, Visayas, ken Mindanao.
Iladawanna pay dagiti bantay, isla, ken dadduma pay a kadandanuman ti pagilian, kangrunaanna ti igigil-ayab ti rebolusion a nangitunda iti panagwaywayas ti Filipinas. (Richielyn Canlas/Manila Bulletin//Lito Hilidon/Bannawag)
