Agbalinen a maysa nga administratibo a rehion dagiti probinsia ti Negros Occidental, Negros Oriental, ken Siquijor (agraman ti Siudad ti Bacolod) kalpasan a pirmaan ni Presidente Ferdinand R. Marcos Jr. ti Republic Act (RA) No. 12000 wenno ti Negros Island Region (NIR) Act itay Huebes, Hunio 13, 2024.
Dimmar-ay dagiti maseknan nga opisial ti Negros Occidental a da Gobernador Eugenio Jose Lacson, Bacolod Mayor Albee Benitez, Moises Padilla Mayor Ella Garcia-Yulo, Kabankalan Mayor Benjie Miranda, Victorias Mayor Javier Miguel Benitez, Diputado ti Bacolod Greg Gasataya, Dip. ti maikalima a distrito Emilio Yulo, Dip. ti maikalima a distrito Mercedes Alvarez-Lansang, Dip. ti maikatlo a distrito Jose Francisco Benitez, ken ni Negros Oriental Gob. Manuel Sagarbarria.
Segun ken ni Presidente Marcos, nabayagen a kasapulan ti Negros Island daytoy a linteg, ta nupay maymaysa nga isla ti yan dagitoy a probinsia, agsasabali met a rehion ti nakaibilanganda.
Ti Negros Occidental ket paset idi ti Region VI, idinto a paset ti Rehion VII ti Negros Oriental ken Siquijor.
Valdez, Opinaldo, Padios, nangabak iti Maika-72 a Palanca Memorial Awards for Literature
Imbatad ni Presidente Marcos a nabayagen nga inibturan dagiti Negrense ti narikut a panagbiahe iti baybay, nakagasgastos, napnuan-red tape, ken kinakigteng ti agdama a kasasaad, nangruna no kasapulanda ti serbisio ti gobierno manipud kadagiti regional center nga adda iti sabali nga isla.
Nasangal ti gakat a pannakabukel ti NIR babaen ti executive order nga impaulog daydi Presidente Benigno Aquino III idi 2015, ngem winaswas ni dati a Presidente Rodrigo Duterte babaen met laeng ti executive order idi 2017.
Idi Marso 12, 2024, inaprobaran ti Senado ti Senate Bill No. 2507 a nangriing iti gakat a pannakabukel ti NIR.
Namnamaen ti Presidente nga agbalin ti NIR (wenno Rehion XVIII) a sentro ti pagrang-ayan iti Visayas, a mangpaganaygay iti sosio-ekonomiko a panagdur-as dagiti minilion a Negrense.
Segun ken ni dati a Senate President Juan Miguel "Migz" Zubiri, ti NIR ti mangitunda iti "golden age" ti Negros.
Malaksid iti daytoy, pinirmaan met ni Presidente Marcos ti RA 12001, wenno ti Real Property Valuation and Assessment Reform Act (RPVARA).
Babaen ti RPVARA, mapapardas ken mapasayaat ti panangikeddeng ken sistema ti panangtingiting iti gatad ti sanikua babaen ti agpapada a panangapresiar iti sanikua a mayataday iti internasional a pagalagadan.
Ti NIR Act ken RPVARA ket nairaman kadagiti kangrunaan a gakat ti Legislative Executive Development Advisory Council (LEDAC). (Argyll Cyrus Geducos/Manila Bulletin//Lito Hilidon/Bannawag)
