Inkalintegan ni Philippine National Police (PNP) Chief General Rommel Francisco Marbil itay Hunio 14, 2024, dagiti polis a nangserrek iti paraangan ni Kingdom of Jesus Christ (KOJC) leader Pastor Apollo Quiboloy iti Siudad ti Davao.
Segun ken ni Marbil, ti raiding team ket buklen dagiti nadumaduma a kameng ti polisia, kas iti Criminal Investigation and Detection Group (CIDG), Special Action Force (SAF), ken dagiti regional units iti Northern Mindanao (Region 10), Soccsksargen (Region 12), ken Caraga (Region 13).
Gandatda ti panangited iti warrant of arrest ni Quiboloy ken dagiti lima pay a kakaduana idi Hunio 10.
Kinuna ni Marbil a nagbalinen a pugante ni Quiboloy gapu iti panangliklikna kadagiti warrant of arrest nga impaulog dagiti korte iti Siudad ti Pasig ken iti Siudad ti Davao, ket saan nga ordinario a tao dagitoy.
COC ni Doc Willie Ong a para senador, impila ti asawana
Kinuna pay ni Marbil a sisasagana ti PNP a mangsango iti ania man a kaso a pakaidaruman dagiti opisial ken polis, idinto a tulonganna dagitoy no maidarumda gapu iti panangiserbida iti warrant of arrest ni Quiboloy.
Itay kallabes, impangta ni dati a Presdente Rodrigo Duterte, a kasinged ni Quiboloy, nga idarumna dagiti polis a nangserrek iti paraangan ni Quiboloy ken nangaramat kano iti nalabes a puersa.
Ngem kinuna ni Marbil a saan a nagaramat iti nalabes a puersa dagiti polis, nupay dagiti pasurot ni Quiboloy ti nangbangen kadagiti polis, ket pinaturonganda pay dagiti polis iti water hose tapno saanda a makastrek.
Imbatad ni Marbil a ti inaramid dagiti pasurot ni Quiboloy a panangpusitsit iti danum kadagiti polis ket maibilang a di panangraem iti autoridad, ngem saan ida nga indarum dagiti polis.
Nupay kasta, idi naammuan ni Marbil ti gandat ni Duterte a mangidarum, binilinna ti PNP Legal Team nga adalenda no ania a kaso ti mabalin nga ipila kadagiti pasurot ni Quiboloy.
Kabayatanna, agtultuloy latta ti panangsapsapul ti PNP ken ni Quiboloy.
Iti sabali a bangir, inaprobaranen ni Marbil ti pannakaikkat ni Police Brig. Gen. Aligre L. Martinez kas regional director ti Davao Police Regional Office (PRO-11); ni Police Brig. Gen. Ronald Oliver Lee kas daulo ti Directorate for Operations (PNP-DO); ken ni Police Col. Edwin Portento a kameng ti Intelligence Group (PNP-IG).
Nayakarda iti Police Holding and Accounting Unit (PHAU) ti Directorate for Personnel and Records Management (PNP-DPRM) tapno maiwayat ti imbestigasion kadakuada.
Inlawlawag ni PNP Spokesperson Police Col. Jean Fajardo nga adda pakainaigan dagiti nayakar nga opisial iti napasamak idi Hunio 10.
Ni Police Brig. Gen. Nicolas Torre III ti nangsukat ken ni Martinez a kas hepe ti Davao Police.
Innayon ni Fajardo a taktakderan ti PNP nga impatungpalda laeng ti warrant of arrest nga impaulog dagiti korte, ket umiso laeng ti imbaonda a puersa ta namnamaenda nga adu ti agkedked a pasurot ni Quiboloy. (Martin Sadongdong/Manila Bulletin//Lito Hilidon/Bannawag)
