Binukel ti Second Congressional Commission on Education (EDCOM 2), Department of Education (DepEd), ken dadduma pay a maseknan iti basic education, ti technical working group (TWG) a mangrepaso ken mangisingasing iti pannakabalbaliw ti Implementing Rules and Regulations (IRR) ti Republic Act 1067, wenno ti Anti-Bullying Act ti 2013.
Naaramid daytoy kalpasan a naiparang dagiti sukisok maipapan iti bullying iti naangay a panagtataripnong ti EDCOM2 Sub-committee on Basic Education.
Maysa kadagitoy ti sukisok nga insayangkat ti De La Salle University (DLSU) a nagkuna nga ad-adu ti kaso ti bullying iti pagadalan ti gobierno.
Natakuatan pay ti sukisok a nasaksaknap ti bullying kadagiti estudiante nga adda iti nababbaba a kasasaad iti kagimongan.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna ni EDCOM 2 co-chairperson ken Dip. ti Siudad ti Pasig Roman Romulo masapul a marepaso ti paglintegan tapno mapabileg ti Child Protection Committee, mapasayaat ti reporting system iti kaso ti bullying, malawlawagan ti anti-bullying a programa ti DepEd, ken masinunuo ti epektibo a pannakaipatungpal ti linteg.
Imbatad ni Dip. Romulo a nupay nabayagen ti Anti-Bullying Act, idi laeng napan a tawen a naiturong ti atension ti DepEd kadagiti kaso ti bullying, ta nangrugi laeng ti Learners’ Rights Protection Office (LRPO) idi napan a tawen.
Ti LRPO ket maysa nga ahensia a binukel ni Bise-Presidente ken DepEd Secretary Sara Z. Duterte, tapno mangsaranay kadagiti mabiktima ti bullying ken panangabuso iti uneg ken iti ruar ti pagadalan. (Wilnard Bacelonia/PNA//Lito Hilidon/Bannawag)
