Simmangbay iti Ninoy Aquino International Airport (NAIA) itay Hunio 17, 2024 dagiti 21 a Filipino a tripulante ti tanker nga MV Tutor, a naispal kalpasan a mapuntaan daytoy iti dua a missile nga impaturong dagiti rebelde a Houthi iti Red Sea.
Babaen ti nagtitipon a puersa dagiti nadumaduma a pagilian, naispal dagiti Filipino a tripulante ti MV Tutor nga agkatang katang iti abagatan a paset ti Red Sea kalpasan a mapuntaan ti missile.
Inkari ni Department of Migrant Workers (DMW) Secretary Hans Leo Cacdac a maikkan iti tulong manipud iti sibubukel a gobierno, dagiti 21 a Filipino a marino a naispal iti Red Sea, kas imbilin ni Presidente Marcos.
Maipaayan dagiti biktima iti PhP150,000 manipud ken ni House Speaker Martin Romualdez; PhP50,000 manipud iti DMW; PhP10,000 manipud iti Overseas Workers Welfare Administration (OWWA); PhP20,000 manipud iti Department of Social Welfare and Development (DSWD).
COC ni Doc Willie Ong a para senador, impila ti asawana
Malaksid kadagitoy, adda pay PhP30,000 (192 a Bahraini Dinar) a naited iti tunggal maysa sakbay nga agluganda iti eroplano.
Kinuna pay ni Cacdac nga agtultuloy latta ti panangsawar iti maysa pay a Filipino a marino a nabati iti MV Tutor.
Sakbay iti pannakaraut ti MV Tutor idi Hunio 12, addan paglintegan nga immpaulog ti DMW a mangpasingked iti kalintegan dagiti Filipino a marino nga agkedked no lumabas iti Red Sea ti barko a pakaipananda.
Naipaulog daytoy tapno mailisi dagiti Filipino a marino iti panangraut kadagiti barko a lumabas iti abagatan a paset ti Red Sea ken iti Aden Gulf, nga agpada a nagbalinen a pagbabakalan.
Ngem iti maysa nga interbiu iti DZBB, imbatad ni Cacdac nga immanamong dagiti 21 a Filipino a marino idi napakaammuanda a lumabas iti Red Sea ti MV Tutor nga agturong koma iti India.
Innayon pay ni Cacdac a nasken a marepaso ti naipaulog a polisia, ta kitaenda no masapul nga ingetanda daytoy. (Aaron Recuenco/Manila Bulletin//Lito Hilidon)
