Naisangpeten itay Hunio 17, 2024 ti bangkay dagiti tallo nga OFW a natay gapu iti pannakauram ti pagnaedanda a pasdek iti al-Mangaf, Kuwait idi Hunio 12.
Da Overseas Workers Welfare Administration (OWWA) Chief Arnell Ignacio ken Department of Migrant Workers (DMW) Secretary Hans Leo Cacdac ti nangkadua kadagiti pamilia dagiti biktima a nangsabet kadagiti bangkay iti Ninoy Aquino International Airport (NAIA) Pair-Pags Center iti Siudad ti Pasay.
Sakbay daytoy, kinasarita ni Ignacio dagiti pamilia dagiti 3 nga OFW ket insalaysayna ti napasamak ken ti kasasaad ti imbestigasion nga insayangkat ti gobierno ti Kuwait.
Inlawlawag ni Ignacio a ti nauram a pasdek ket pagnaedan dagiti agtrabtrabaho iti maysa a construction company sadiay Kuwait.
Kiddaw ni Quiboloy a Medical Furlough, inanamongan ti Pasig RTC
Imbatad ti Legal Team ti DMW iti Kuwat nga ad-adalenda no mabalinda ti agidarum, maibatay iti resulta ti imbestigasion.
Sangapulo ket maysa nga OFW ti naapektaran, idinto a dua ti adda pay laeng iti pagagasan ken bambantayan ti Migrant Workers Office iti Kuwait
Agdagup iti 49 a tao ti natay, a kaaduanna ti Indiano.
Impanamnama ti OWWA a maawat dagiti pamilia dagiti biktima ti umisu a benepisioda iti kabiitan a panawen. (Marita Moaje/PNA//Lito Hilidon/Bannawag)
