Naglusulos ni Bise-Presidente Sara Z. Duterte kas Department of Education (DepEd) Secretary ken National Task Force to End Local Communist Armed Conflict (NTF-ELCAC) Vice-chairman ita, Hunio 19, 2024.
Impakaammo ni Bise-Presidente Duterte ti panaglusulosna iti DepEd Central Office iti Pasig City kalpasan nga intedna ti irrevocable resignation ken Presidente Ferdinand R. Marcos Jr., ken agserbi a 30-day notice.
Inlawlawag ni Duterte a saan a ti "kinakapuy" ti makaigapu iti panaglusulosna iti DepEd, no di ket ti panangisakitna kadagiti mannursuro ken kadagiti agtutubo.
Saan a sinungbatan ni Duterte ti saludsod no apay a naglusulos isuna kas daulo ti DepEd, ngem kinunana nga agtultuloy latta ti panangitandudona iti de-kalidad nga edukasion, ken ti panagserbina a kas Bise-Presidente ti pagilian.
COC ni Doc Willie Ong a para senador, impila ti asawana
Idi 2022, nagasmang ti pamilia Marcos ken Duterte tapno mangabakda iti eleksion.
Apagtugaw ni Presidente Marcos idi Hunio 30, 2022, dinutokanna ni Duterte a kas daulo ti DepEd.
Iti ngalay ti 2023, bimmaba ti approval rating ni Duterte gapu iti panagkiddawna iti PhP650 a milion a confidential fund, a nangitunda iti panagrisiris dagiti oposision iti Kongreso ken dagiti progresibo a grupo. (Ivy Tejano/Manila Bulletin//Lito Hilidon/Bannawag)
