Agtalinaed a nangato ti moral dagiti soldado ti Armed Forces of the Philippines (AFP) kalpasan ti panangranggas kadakuada ti China Coast Guard (CCG) bayat ti rotation and reprovision (RORE) mission iti Ayungin Shoal a nangdangran iti kameng ti Philippine Navy (PN) idi Hunio 17, 2024.
Daytoy ti impanamnama ni AFP Chief of Staff, General Romeo Brawner Jr., a nangsarungkar kadagiti soldado iti Palawan itay Hunio 19, tapno kitaenna ti moral ken kasasaad dagiti soldado a rinanggasan dagiti kameng ti CCG.
Kinasarita pay ni Brawner dagiti soldado a mangbambantay iti BRP Sierra Madre iti Ayungin Shoal babaen ti video teleconference (VTC) agraman dagiti naisaad kadagiti dadduma pay a kampo ken estasion iti West Philippine Sea (WPS) ken iti Palawan.
Dinayaw ni Brawner ti panagteppel dagiti soldado ken kameng ti Philippine Coast Guard (PCG) nupay dinangran ken binangenan ida dagiti CCG ken Chinese Militia bayat ti naiwayat a RORE mission.
Mangnamnama ni Marcos iti pannakaisubli ti panangipateg ni Pinoy iti arte a Filipino
Naputed ti tangan ti kanawan nga ima ni Seaman First Class Underwater Operator Jeffrey Facundo, a kameng ti Naval Special Operations Group (NAVSOG) ti PN, idi dinungpar ti rigid hull inflatable boat (RHIB) ti China ti bilog a pagluglugananna.
Sinaranay a dagus ti PCG ni Facundo.
Segun iti AFP, sinerrek dagiti CCG ti bilog ti AFP, sa sinamsamda dagiti igam ti soldado, agraman dagiti makina ken motor, ket dinadaelda pay dagiti communication ken navigational equipment ti AFP. (Martin Sadongdong/Manila Bulletin//Lito Hilidon/Bannawag)
