Saan a mangipaay iti pagsayaatan dagiti konsiumer a Filipino ti pannakasuspenso ti excise tax iti gasolina ken krudo (diesel), ta bassit laeng ti maksay iti presio dagitoy ken saan a marikna ti epektona gapu kadagiti agsaksaknap a puersa ti merkado.
Daytoy ti inlawlawag ti Cabinet-level Development Budget Coordination Committee (DBCC) idi Abril 14, no apay a ti laeng excise tax ti kerosene (gaas) ken liquefied petroleum gas (LPG) ti nasuspenso.
Imbes a pannakasuspenso ti excise tax ti krudo ken gasolina, kinuna ti gobierno nga agtultuloy ti panangipaayda iti nayon nga ayuda kadagiti sektor a nakaro a naapektaran ti ngumatngato a presio ti lana a para iti transportasion.
Kangrunaan a benepisiario dagiti opereytor ti para iti publiko a lugan, drayber, pasahero, mannalon, ken mangngalap.
Kinuna ni sekretario ti Department of Finance (DOF) Frederick D. Go a gandatda ti mangipaay iti balanse ken responsable a pamuspusan tapno agpada a mataming ti agdama ken ti napaut a parikut a pinataud dagiti dadduma a pagilian.
ICC Prosecution, rugianda ti pannakabista iti kaso ni dati a presidente Duterte inton Nobiembre 30
Segun iti DOF, dakkel ti mapukaw iti gobierno no mairaman a masuspenso ti excise tax dagiti krudo ken gasolina, nga agbalor iti ₱50 a bilion iti las-ud ti tallo a bulan ti mapukaw iti gobierno.
Innayon ti DOF a dagiti laeng babaknang ti agnumar iti pannakasuspenso ti excise tax ti krudo ken gasolina nga agus-usar iti ad-adu a krudo ken gasolina idinto a mapukawan ti pondo dagiti nakurapay a sektor. (Derco Rosal/Manila Bulletin//Lito Hilidon/Bannawag)
