Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
--
(Maika-26 a Paset)
KINUSILAPAN ni Johnny da Dex ken Jong idi maingatona ti siperna. Ad-adda ketdi nga imlek dagiti dua. Insublatna a pinarukiban ni Ella. Um-umlek ti balasang a nangisuyat iti ipainumda koma ken ni Johnny sa indissona ti baso iti sagpatan ti kalapaw ni Dex.
“Baka sobra ti kinangato ti gurigormo, ha, Johnny? Agam-ammangawkan sa!” Inasitgan ni Ella ni Johnny ket dinapadapna kampay idi ti lengnges daytoy.
Saanen a naigawid da Dex ken Jong ti paggaakda sa naglinnipakda iti dakulap.
NOBELA: Apo Baboy Party-List (6)
“At las, naipeksana met laengen ti riknana uray kaskasano!” kinuna ni Jong.
“Ayna, Johnny, immuna pay gayam da Dex ken Jong a nangibagaam iti riknam ngem iti siak. Ano, para sila ang magsabi sa akin?”
Kasla naitalmeg ti ulo ni Johnny. “Hindi naman, he-he-he!” Kunam la no mabekbekkel ni Johnny iti panangpilitna nga agkatawa. Nupay kasta, limmukay ti irteng ti riknana iti rabak ni Ella. “Talaga met nga ibagakto. Right time, at the right place, he-he-he!”
Ad-addan ti ellek ni Ella. “Pa-right time, right place ka pa ket naibagam la ngaruden!”
Wen, aya? nakuna ni Johnny iti unegna.
“Sabagay, nabayagen nga ammok nga adda riknam kaniak, di ngamin? Magsabi ka ng totoo!” immulagat ni Ella.
Ania ngarud, napilpil ti isem ni Johnny a nangperreng ken ni Ella. “W-wen ngarud!” Kinudkodna ti teltelna.
Agsao pay koma ni Ella ngem naiduron ti rikep ti ruangan. Winayaanna ti ruangan ket pinastrekna ni Derri.
“Tuloy!” Pinayapayan ni Ella ni Derri. “May dala ka?”
“Siyempre, ikaw pa!” insungbat ni Derri ket nagtarusanna nga inlagid ti pingpingna iti pingping ni Ella sa nagsultop kampay idi.
Kunam pay, nakasuron ni Johnny, ngem saanen a nagpadlaw.
“Yan dagiti manok?” sinaludsod ni Ella.
Kinita ni Derri ni Johnny. “Boy, kunin mo ang mga manok sa van!”
Kasla napitik ti lapayag ni Johnny. “Nakalimutan mo na? Doktor ako!” imbang-es ni Johnny.
“Nasaan, boss?” sinaludsod ni Jong.
“Nasa van na puti sa labas!” insungbat ni Derri, impalladawna ti tulbek ken ni Jong. “Dalhin na rin ang single. Inahin ang laman.”
Dua nga umasul a plastik ti nakaikargaan dagiti manok. Nagsinsinan da Jong ken Dex a binitbit nga inserrek iti mini-farm. Impisokda dagitoy kadagiti bakante a takkab. Bin-ig a darisayen dagiti manok. Kasla agpapada ti kadakkelda.
Innala ni Ella dagiti glab a naisab-it iti lansa iti diding ti kalapaw. Kinitana ni Dex.
Napugtuan ni Derri ti panggep ni Ella ket pinarana daytoy. “‘Wag na, da best dagita iti batch-da,” kinunana.
Ngem immisem laeng ni Ella. “Naniniguro lang ako,” insungbatna. “Kunin n’yo ang isang winner ni daddy,” kinunana ken ni Jong.
“’Diay pulang linaw a di nagsugat,” kinuna met ni Mang Bianong.
“Tested na ang magkakapatid na ‘yan,” kinuna latta ni Derri. “Tinawagan ako kahapon ang may-ari ng VVV Farm idiay Santa Praxedes at ibinalita na champion sa 3-Cock Derby sa Ipil Cockpit Arena sa Gonzaga ang entry niya na kapatid ng mga ito na binili sa akin.”
Ngem kasla awan nangngeg ni Ella. Innalana ti adda iti takkab a kas iti kadakkel ti manok ni Mang Bianong ket inikkan ni Jong iti glab. Insublatna a kinabitan iti glab ti ubba ni Dex.
Agngilngilangil nga umis-isem ni Mang Bianong a mangpalpaliiw iti garaw ni Ella. Kasano ngamin ket awanen ti madlawna a pannakasammokol wenno garaw-agdadamo nga agiggem iti manok iti balasangna. Uray iti panagpasippit, kabesadon ni Ella a patangaden a pasippitan ti tengnged ti manokna. Kasta met ti panangisarangna iti luy-ong ti manok tapno pasippitanna tapno lalo a bumara daytoy.
Nagpinnasikad da Ella ken Dex. Madlaw ti kinatanang ti darisayen uray iti panagsekkad laeng daytoy. Sagsaggaysa ti panagsekkadna idinto ta uray la maikup-ay ti daga a pagsekkadan ti manok ni Mang Bianong.
Nagpinnaayat da Ella ken Dex sa indissoda dagiti manok.
Nagpanerper ti payak ti manok ni Mang Bianong iti panagtayabna. Tinangad laeng ti darisayen ti kalabanna ngem sinurotna ti pagturongan daytoy. Sa sakbay nga agdisso ti manok ni Mang Bianong, pinarakapakna daytoy. Uray la napugiit ti manok ni Mang Bianong iti pannakaidaramudomna.
Nakabangon ken nakabuelta met a dagus ti manok ni Mang Bianong ket napungotna ti dutdot iti teltel ti darisayen ket nagginnelgelda. Ngem kas namnamaen, napigpigsa ti kugtar ti darisayen ta naggapu daytoy iti dakkel a farm a kompleto ti pannakaaywan dagiti taraken.
Sabali met ti impakita ti maikadua a darisayen. Sinurotna ti timmayab a kapolisna sa tinaragatagna nga impababa.
Napnek ni Ella kalpasan a mapolisda ti uppat nga intugot ni Derri. No mabalin, gatangenna ida nga uppat uray no tallo laeng ti iderbina, ngem problemana ti budget-na.
“Alin sa apat ang napili mo?” sinaludsod ni Derri ken ni Ella.
“Sandali lang,” kinuna met ni Ella ket tinung-edanna ni Johnny. “Masapul a makapasa iti panangeksamen ti beterinariok dagiti gatangek!”
“Aw, di na kailangan. Pinatingnan ko sa beterinaryo ko ang mga iyan bago ko dinala dito.”
“Siyempre, buyer ako at gusto ko lang makasiguro na A-1 ang kondisyon ng bibilhin ko. Di ba ganun ka rin kung bumibili ka?” imbales ni Ella.
Ania ngarud, saanen a naguni ni Derri. Siniputanna laengen ni Johnny a nangyaon iti umuna a manok iti takkab.
Immuna nga iniggaman ni Johnny dagiti gurong ti manok sa inunnatna a nakasango kenkuana. Kalpasanna, pinatallikudna sa binaliwanna nga inunnat dagiti gurong ti manok. Nagtungtung-ed a nangipasango iti manok kenkuana sa inangotna ti ulo daytoy. Namitlo, namimpat nga inangotna. Kalpasanna, nagtungtung-ed a nangisubli iti takkab.
Kasta met laeng ti inaramidna iti maikadua ken maikatlo. Ngem nagrupanget idi angotenna ti ulo ti maikapat. Kinitana ni Ella.
“Apay?” kinuna ni Ella.
“Nabangsit. Adda panatengna!” Nagbang-es sa nagmusiig ni Johnny.
Nagkusipet ni Derri. “Ano! Paano nagkasipon? Kinita ida ti beterinariok sakbay nga impakastoyko! Baka adda diperensia ti agongmo? Dayta pay met ngarud ti kalainganda!”
“Ako ang beterinaryo, hindi ikaw!” insungbat ni Johnny. Impisokna ti manok iti takkab sa inlibasna nga impuligad ti tammudona iti nabasa a lugit daytoy. Inyaonna met laeng ti manok sa binaliwanna a binagtin kampay idi. Inridisna ti tammudona iti agong ti manok sa inam-amloyanna. “Daytoy pay, a, ti kapintasan iti pammagi!”
“Tingnan mong mabuti. Sayang naman. ‘Yan ang kursonada ko sa apat,” kinuna met ni Mang Bianong.
Immasideg ni Dex. “’Mo ta diram-osak. Baka naalian laeng iti angot ti nakaikargaanna,” kinunana.
Ngem inlisi ni Johnny ti manok. “Hanka man a bumibiang!” inkusilap ni Johnny sa inlibasna a kiniddayan ni Ella.
Kas namnamaen ni Johnny, immasideg ni Derri ket innalana ti manok. “Tingnan ko nga,” kinunana. “Pangalawang beses na ito na sinabi mong may sakit ang manok na dinadala ko kay Ella. Sinisiraan mo yata ako, a!”
“Beterinaryo ako at alam ko ang sinasabi ko,” kinuna met ni Johnny. “Amuyin mo para mapatunayan mo!”
Inang-angot nga agpayso ni Derri ti ulo ti manokna. Ngem gapu ta dina mapaggigidiat ti angot ti agong ti manok nga adda sakitna, ken awan, nagmusiig lattan idi maangotna ti ulo ti manokna. Isublina koman iti plastik a nagkargaanna, ngem inatipa ni Ella.
“Di bale, gatangek laengen ngem ti isublim pay laeng,” kinuna ni Ella. “Ngem saanen nga iti presio ti nasalun-at a manok,” insilpona.
“’Wag! Ayaw kong magbenta ng di healthy. Makakasira sa business ko. Sisante ang aabutin ng lokong beterinaryo ko!” impangta ni Derri.
“Pero, anak, baka mahawa ang mga manok natin!” impalagip ni Mang Bianong.
Ngem desidido ni Ella a mangibati iti manok. Innalana ti manok ken ni Derri sa inyawatna ken ni Dex. “Magkano lahat?”
“Fifteen ‘yang tatlo na healthy, at tatlo na lang ang may sipon.”
Saanen a timmawar ni Ella. Kinautna ti nakupin a kuarta iti bolsa ti shorts-na. Binilangna ti pagbayadna sa inyawatna ken ni Derri.
Agngilngilangil ni Derri a nangipisok iti petakana iti pinagbayad ni Ella. “Pasensiya ka na, sweetheart. Hayaan mo’t sa susunod, sigurado nang A-1 na lahat ang dadalhin ko sa iyo. At kung mamatay ang may sipon, papalitan ko,” kinunana ket nagpakadan.
Agkatkatawa ni Ella a nakiapir ken ni Johnny idi awanen ni Derri idinto nga ang-angoten pay laeng ni Dex ti ulo ti manok nga imbaga ni Johnny nga agpanateng.
“Thanks, BBJ!” Pimgaak ni Ella.
Nasdaaw ni Mang Bianong. Pinagsisinnublatna a kinita dagiti kasangsangona. Kas kenkuana, langa met ti masmasdaaw da Dex ken Jong. Ni Johnny laeng ti kasla saan a masdaaw no apay nga agkatkatawa ni Ella.
“Apay?” saanen a nakateppel ni Mang Bianong.
“Nakadiskuento ‘ti dakkel!” Nakiapir manen ni Ella nga agkatkatawa ken ni Johnny.
Nupay saan a mapnek iti sungbat ni Ella, kinudkod laengen ni Mang Bianong ti ulona sa nagturong iti ruangan ti mini-farm. Imbaga met ni Johnny ken ni Dex a bugguanna ti ulo ti manok. Siaalisto met a nagtungpal ni Dex uray no dina ammo ti gapu ti paaramid ni Johnny kenkuana.
“Job well done, honey!” Nagkatawa manen ni Ella sa dinanogna iti nalag-an ti abaga ni Johnny.
Kasla naitayok ni Johnny iti nangngegna. Diosko, nobiak san, nakunana iti unegna.
Inruar met ni Ella ti selponna ket indayalna ti numero ni Elmer. Ngem awan sungbat ni Elmer. Sinangona da Dex ken Jong. “Sabihin kay Elmer na bukas din ay umpisahan na ang training ng mga manok,” kinunana. Sinangona ni Johnny. “Ano, maiwan ka muna dito?”
Isu pay laeng ti pannakalagip ni Johnny nga awan pay ti kustomer ti klinikana manipud itay agsapa. “Mapanak metten ket adu ti agur-uray kaniak idiay klinik,” insungbatna ket sinarunonan ni Ella.
ALAS singko pay laeng iti agsapa ngem naslepen iti ling-et ti puraw a tisert ni Elmer. Uray ti maong a shorts-na, marikriknana a sinaruten ti dam-eg ti brief-na a naslep metten iti ling-et.
Nagpug-aw ni Elmer. Impisokna ti agal-al-al a manok iti takkab ket inuksobna ti tisertna. Pinekkelanna sa impunasna iti rupa ken bagina. Tinurongna ti tagaang iti sikigan ti kalapaw ni Dex. Inadawna ti agsagsagawisiw a takuri sa ginaw-atna ti termos ni Dex a nakasagana iti sagpatan ti kalapaw. Isu met a sumrek iti ruangan ni Dex a napan nangpadaan iti aglaklako iti pandesal iti kanto ti Karpa St. ken Kitang St.
“Nalpaskan?” dinamag ni Dex.
“Kalleppasko,” insungbat ni Elmer. “Naimbag ta natuloken dagiti sakada. Siguro, watwatwaten dagiti tao ni Derri dagiti manokda no mabalindan nga ilako.”
“Aglalo dayta darisayen a burik ti barukongna. Nalaing dayta. Isu pay ti kalakaan iti inggatang ni Ella,” kinuna met ni Dex.
“Apay, mano ti inggatangna?”
“Tres mil la'ng! Imbaga ngamin ni Johnny nga adda sakitna.”
“Ket no nagpintas ti pammagina. Nakaparparagsit!” “
“Adda nabaybay-an a panatengna, kuna met ni Johnny.”
Innala ni Elmer ti manok ket inangotna ti ulo daytoy. “Awan met. Nalaka a madlaw no adda panateng ti manok aglalo no nabayagen. Nabangsit ti ulona,” kinunana.
Kinuti ni Dex ti abagana. “’Mok pay kaniana. Namati met ni Derri. Agalmusarta ketdin. Agpakanakto no malpasta,” kinuna ni Dex. Nangala iti saggaysada a tasa ken Elmer sa binukbokanna iti napudot a danum. “Anusamon ti three in one ket awan ti igatangko iti gatas ken naigarrapon. Kupkupitek laeng ti igatgatangko iti kapek, kunam man!” inkatawana.
“Kasano?”
“No pagatangendak iti sangapulo kilo a conditioner, walo laeng ti alaek,” inyellek ni Dex. “Utak, utak!” Intudona ti pispisna.
Impalagip ni Elmer ti panangsurot ni Dex iti umno a panagpakan kadagiti isagsaganada nga iderbi idi makapamigatda. “Surotem a suroten ti kombinasion dagiti kanenda iti kada pannanganda. Dimo met langanan ti panagpainummo iti agasda. Sabali ti pannakaisagana dagiti maiderbi kadagiti mailaban iti ulotan. Masapul a nalag-anda laeng. Ngem masapul a natibker ken manayonan ti power-da. Bentahe no dakkel ti manok ngem nababa ti ti timbengna,” kinunana.
“Masapul nga adda koma metten materialestayo para iti derbi dita Kaybiga,” kinuna met ni Dex. “Saan a dakes a marugian koma met itan a maisagana dagiti ilabantayo.”
“Koma, a. Ngem small time pay met lang ni boss. Bassit ti pagtultulidenna a puonan. No maabak ti maysa nga ilabanna, dakkelen a pukaw kenkuana ta maksayan ti igatangna iti manokna kasta met ti para pustana.”
Naputed ti panagpatang da Dex ken Elmer idi agkiriring ti selpon ti naud-udi. Agsingir ti immuna a napanunot ni Elmer isu a dina ikaskaso. Piniselna pay ketdi iti maikadua a daras a panagkiriringna. Ngem nasusungeg iti maikatlo a daras ket sisusuron a simmungbat.
“Hello! Wala pa akong pambayad eh. Next week na lang. Ako nang pupunta sa inyo para magbayad,” kinunana ket piniselna manen ti selponna.
Ngem ibolbolsana pay laeng ti selponna, nagkiriring manen.
“Di ba sinabi ko na ako na mismo ang pupunta sa inyo para magbayad? Sob—“ saan a naituloy ni Elmer idi agkatawa ti timmawag. “Ilokanoka met? Kasta? 'Ba, ‘sino ti madi nga agkakuarta? Mangrabiita dita Lutong Ilokano dita Visayas Avenue no madamdama? Ania ti madaydayaw a naganmo, kailian? Ando? O, linalakay a nagan dayta. Anding laengen ti yawagko kenka. Okey, Anding, ‘ton sardam, alas siete. Basta saan nga akyat bahay, ha! Wenno hold-ap. Okey, babu!”
“Sino daydiay? “ dinamag ni Dex idi maibolsa ni Elmer ti selponna.
“Kabarbaro nga am-ammo. Ando kano ti naganna. Mangrabiikam' kano dita Visayas Avenue ta adda pagsaritaanmi a panguartaan!” insungbat ni Elmer. “Kitaem kad’ ni gasat no agmamayat ta isu pay ti kumalay-at!”
“Ay, agannadka. Baka hold-aper wenno kameng ti grupo dagiti kidnaper dayta! Ta nangalaanna koma iti numero ti selponmo?” kinuna ni Dex. “Saan a bale nga agpaparawka a mangipukpukkaw iti po-siyam ken kuatres, adayoka la ketdi iti desgrasia!”
Nagtungtung-ed ni Elmer. Rinaemna ti palagip ti kaduana. “Dika madanagan, wais ‘toy prenmo!” inkatawana.
KINITA ni Elmer ti relona. Sangapulo a minuto pay sa alas sais. Apagisunto, nakunana iti unegna ket namles. Manipud ditoy Quimco Subdivision a pagkaseraanna, duapulo a minuto laeng addan iti nagsulian ti Mindanao Avenue ken Congressional Avenue. Mabalinnan a pagnaen no kua ti Lutong Ilokano Restaurant iti batog ti Cherry.
Nagsimpan ti sipnget idi dumsaag iti dyip iti nagsulian ti Mindanao Avenue ken Congressional Avenue. Apagisu met a maikapito idi makadanon iti restaurant a pagkitaanda iti nangawis kenkuana.
Sumagmamano pay laeng a lamisaan ti okupado iti panakkelen a restaurant. Inwaras ni Elmer ti panagkitana idi makastrek. Adda agmaymaysa a lalaki, nga in-innauna ngem isuna iti langa, nga umin-inum iti beer iti maysa a suli. Pangrapisem ken crewcut ti buokna a dandanin maisapaw.
Immasideg ni Elmer. Nagsay-a. “Anding?”
Saan a naituloy ti lalaki nga itangad ti basona. Tinaliawna ni Elmer. “Elmer? Wen, siak ti timmawag. Agtugawka, kailian!” Timmakder ti lalaki ket impasanudna ti tugaw a para ken ni Elmer. Kalpasanna, inyawatna ti dakulapna. “Komusta, kailian?”
“Okey lang, sabungero pa rin!” inkatawa ni Elmer.
Nagkatawa met ni Anding. Nagsipat sa pinayapayanna ti panglukmegen a serbidora. “Apat na beer at lechon kawali!”
Nagtung-ed ti serbidora sa kasla agin-iniin a pato a nagturong iti counter. “Apat na beer at lechon kawali, Dodong!” inyorderna.
“Malakssid ‘ti pallot, ania pay ti raketmo, kailian?” inlatawa ni Anding idi maitulod ti order-na a beer.
“Buy and sell iti baud!” insungbat met ni Elmer. “Apagisu laeng nga ipaw-it idiay probinsia ti masapulan!” Bigla nga adda naggilap iti muging ni Elmer. “Agurayka, sika ti agpatpatadi iti manok ni Bitangcol?”
Nagkatawa ni Anding. “Eksakli, kailian. Sika met ti labahero ni Queen Ella!” kinunana. “Ammok nga Ilokanokayo ta mangmangngegko no agpapatangkayo. No namin-ano metten nga inabakyo ni boss-ko!” Nagkatawa iti ababa.
Ammo itan ni Elmer no kasano a naalada ti numero ti selponna.
Intulod ti serbidora ti lechon kawali a pulotanda. Pinallilitan ti serbidora ni Elmer idi idissona ti plato a naglaon iti pulotanda.
Nagkatawa ni Anding idi saan man la a kinita ni Elmer ti serbidora. Intudokna ketdi ti tenedorna iti sangaiwa a karne sa insakmolna.
“Sika met, kailian, dimo pay sinubalitan ti isem ti serbidora! Seksi pay met ngarud!”
Pudno met ngamin a di man la kinita ni Elmer ti serbidora. Nagkatawa ni Elmer. “Nasekseksi ngamin ti litson!” kinunana. Nangtudok manen iti sangaiwa sa pinabulonanna iti beer.
Mangmangandan idi ipalagip ni Elmer ti panguartaan a kinuna ni Anding iti selpon. ”Saan la ketdi a panagtakaw ken panagsuitik, mayatak,” kinunana.
Nagkatawa ni Anding. “Hustoka, kailian. Saan a panagtakaw daytoy a pagpastrekantayo,” kinunana. “Kinapudnona, pallot met laeng.”
“Pallot met la gayam. Kasano?”
“Kastoy, kailian. Kinita ni boss ti listaan dagiti nangibaga a lumaban iti paderbina. Dimo ngata patien, ngem dudua ti kaamakna a makalaban…” Umis-isem ni Anding a nangperreng ken ni Elmer.
“’Sinoda?”
“Da Queen Ella ken ti Bubuyog 2 ni Gino!” Nagtalinaed a nakaperreng ni Anding ken ni Elmer.
“Namin-ano metten nga inabakmi ni Gino. Ket ibagak itan: pangkampeonato dagiti manokmi,” impangas ni Elmer. “Target ni Ella a rimbawan ti record da Bitangcol ken Gino. Wen gayam, sino ngamin ti amom?”
“Ni Mister Bitangcol. Isu ngarud ti nangibaon kaniak tapno birokenka. Bilib ngamin kenka kas gaffer. Nadlawmi a sumabit latta ti tadim basta dumanog ti manokyo.”
“Ibagamon no ania ti kayatmo ket diak makapagbayag, kailian. Adda pay appointment-ko,” impangas ni Elmer.
“Kayat ni Boss Bitangcol a no bilang datayo ti aglaban iti kampeonato, aregluem ti tadi ti manokyo. Gumanarka iti one hundred fifty thousand!” Di man la nagtibbakol ni Anding a nangibaga.
Pinerreng ni Elmer ni Anding. Nagtungtung-ed. Binukbokanna ti basona ket dina imbaba agingga iti di naatianan.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
