Kalpasan iti pito a tawen, naabsuelto met laeng ni dati a Senador Leila de Lima iti a kasona a conspiracy to commit illegal drug trading (Criminal Case no. 17-167) nga impila ti Department of Justice (DOJ) idi Pebrero, 2017.
Daytoy ti maudi kadagiti tallo a kaso ni De Lima idi 2017.
Sakbay daytoy, naabsuelton ni De Lima iti dua a kasona a naipila iti Siudad ti Muntinlupa kalpasan a na-dismiss dagitoy idi 2021 (Criminal Case No. 17-165), ken idi 2023 (Case no. 17-166) gapu met laeng iti kinakapuy ti ebidensia.
Itay Hunio 24, 2024, pinatgan ti Muntinlupa Regional Trial Court (RTC) Branch 206 ti impila ni De Lima a demurrer to evidence idi Marso 20.
COC ni Doc Willie Ong a para senador, impila ti asawana
Iti Case no. 17-167, indarum ti DOJ da De Lima, Franklin Jesus B. Bucayu, Ronnie Palisoc Dayan, Joenel Tan Sanchez, ken Jose Adrian Tiamson Dera iti kaso nga illegal drug trading.
Ngem binaliwan ti DOJ daytoy ket nagbalin a conspiracy to commit illegal drug trading, gapu iti panangusar kano da De Lima kadagiti balud iti New Bilibid Prison iti Muntinlupa, nga aglako iti iligal a droga babaen ti selpon ken dadduma pay a gadget, ken nakaganansiada kano iti PhP70 a milion.
Idi Nobiembre, 2023, pinatgan ti Muntinlupa RTC Branch 206 ti kiddaw ni De Lima ken dagiti kakaduana a makapagpiansada, gapu ta nakapuy ti ebidensia ti prosekusion.
Segun iti pangngeddeng ni Muntinlupa RTC Branch 206 Presiding Judge Gener Gito, kalpasan ti pannakatingiting ti pakabuklan dagiti ebidensia nga imparang ti prosekusion, natakuatan a saanda a napaneknekan a nagbasol dagiti naidarum.
Maibatay kadagiti naglabas a pangngeddeng ti Korte Suprema, no mapatgan ti demurrer to evidence iti kaso a kriminal, katukad daytoy ti pannakaabsuelto ti naidarum. Ket ania man a pannakaidarum gapu iti isu met laeng a kaso, ket maisalungasing iti kalintegan ti tao maibusor iti double jeopardy.
Gapu iti pannakaabsueltona, ad-addan a determinado ni De Lima a tulongan ti International Criminal Court (ICC) iti panangimbestigarda iti war on drugs ni dati a Presidente Duterte. (Jonathan Hicap/Manila Bulletin//Lito Hilidon/Bannawag)
