Imparang ni House Speaker Martin Romualdez dagiti nagapuanan ti Kamara iti naangay a Legislative-Executive Development Council (LEDAC) ita, Hunio 25, 2024, iti Kalayaan Hall ti Makalanyang, nga idadauluan ni Presidente Ferdinand R. Marcos Jr.
Dimmar-ay met da National Economic and Development Authority Secretary Arsenio M. Balisacan; Chief Presidential Legal Counsel Juan Ponce Enrile; Special Assistant to the President Antonio Lagdameo Jr.; Special Assistant to the President for Investment and Economic Affairs Frederick Go; Budget Secretary Amenah Pangandaman; ken dadduma pay nga opisial ti gobierno.
Daytoy met ti damo nga itatabuno ni Senador Francis "Chiz" Escudero iti LEDAC kas Senate President.
Daytoyen ti maudi a tawen ti maika-19 a Kongreso, wenno ti maikatlo a regular a sesion, a mangrugi inton Hulio 22, nga aldaw ti State Of the Nation Address (SONA).
Balikatan Exercise ti Filipinas, US, marugian ita nga aldaw
Segun ken ni Romualdez, inaprobaranen ti Kamara, iti 3rd ken final reading, dagiti 20 a kangrunaan a gakat ti LEDAC, a gandat a paipaulog iti arinunos ti Hunio 2024.
Kinuna ni Romualdez a tallo a gakat ti nagbalinen a linteg ken pinirmaanen ti Presidente: ti Philippine Ecosystem and Natural Capital Accounting System Act, Real Property Valuation and Assessment Reform Act, ken ti Negros Island Region Act.
Inaprobaran metten ti bicameral conference committee (bicam) dagiti singasing a pannakaamendar ti Anti-Agricultural Smuggling Act, ken ti Government Procurement Reform Act.
Inaprobaran met ti Kamara dagiti inamendaran ti Senado nga Anti-Financial Accounts Scamming Act.
Uppat pay a gakat ti pagsasaritaan ti bicam, kas iti: Philippine Defense Industry Development Act/Self-Reliant Defense Posture Act, ti Philippine Maritime Zones Act, ti Academic Recovery and Accessible Learning Program Act, ken ti VAT (value added tax) on Digital Transactions Act.
Dagiti sangapulo a gakat ti LEDAC nga inaprobaranen ti Kamara iti 3rd and final reading: ti Waste Treatment Technology Act, ti Instituting a National Citizens Service Training Program, ti E-Governance Act, ti Open Access in Data Transmission Act, ti Military and Uniformed Personnel Pension Reform Bill, ti Blue Economy Act, ti Department of Water Resources/ National Water Resources Act, ti Enhancing Philippine Tax Incentive/ CREATE MORE, Enterprise-Based Education and Training Program Act, ken ti pannakaamendar ti Universal Health Care Act. (Ellson Quismorio/Manila Bulletin//Lito Hilidon/Bannawag)
