Naing-inget a paglintegan ti ipaulog ti Department of Migrant Workers (DMW) kadagiti Overseas Filipino Worker (OFW) a mapan iti Kuwait, kalpasan a winaswas daytoy ti visa ban kadagiti Filipino a mapan agtrabaho sadiay.
Segun ken ni DMW Secretary Hans Leo Cacdac, papigsaenda pay ti panangwanawanda iti kasasaad dagiti OFW iti Gulf state, kas napagnumuan ti Filipinas ken Kuwait.
Mairaman iti daytoy ti pannakaipatungpal iti sistema a pakailanadan dagiti blacklist ken whitelist dagiti recruitment agency ken employer, ti pannakaipaay iti sueldo babaen ti electronic payment tapno masinunuo a saan a maladaw ti sueldo, ken ti pannakadutok ti agpaay a kas welfare officer a mangbantay, mangireport, ken mangtulong kadagiti pakaseknan ti OFW bayat iti kaaddada iti Kuwait.
Nagtulag pay ti Filipinas ken Kuwait iti pannakabukel ti joint technical working committee a makiinnuman iti pannakarisut dagiti parikut ken dadduma pay a pakaseknan dagiti OFW. (Marita Moaje/PNA//Lito Hilidon/Bannawag)
