Kiniddaw dagiti nadumaduma a gunglo ti negosiante a Filipino-Chinese (Fil-Chi) iti gobierno ti Filipinas ken iti China nga adda koma talna iti West Philippine Sea (WPS) babaen ti panagsarita dagiti dua a pagilian iti neutral ken diplomatiko a lugar.
Iti joint statement nga inruar ti Federation of Filipino Chinese Chambers of Commerce Industry, Inc. (FFCCCII) ken 32 pay a gunglo ti Filipino-Chinese itay Hunio 25, 2024, inawaganda ti atension ti Filipinas ken China gapu iti mapaspasamak iti WPS.
Kiniddawda nga agsarita koma dagiti dua a pagilian iti neutral ken diplomatiko a lugar tapno mapagtalinaed ti maibasar-linteg a kinaurnos ken masalakniban ti kinaagwaywayas dagiti dua a pagilian ken agtalinaed ti panaggagayyem iti Asia.
Kinuna dagiti grupo a supsuportaranda ti diplomasia nga itantandudo ni Presidente Marcos iti panangtaming iti ania man a pagdudumaan, ken ti natalna a pannakarisut daytoy a riri.
COC ni Doc Willie Ong a para senador, impila ti asawana
Patien ti grupo a babaen ti panagsarita nga awanan ti panangumsi ken panangkondenar, mabalin a masarakan ti dua a pagilian ti pagkatunosanda, a mangyeg iti nainkappiaan a pannakarisut ti parikut.
Impalagip pay ti grupo ti nabayagen a panaggayyem ti Filipinas ken China, idinto a nagkaduada idi World War II. (Joseph Pedrajas/Manila Bulletin//Lito Hilidon/Bannawag)
