Inaprobaran dagiti kameng ti National Economic and Development Authority (NEDA) ti pannakabukel ti proyekto nga aggatad iti PhP16.1 a bilion tapno mapapartak ti internet ti Filipinas babaen ti digital infrastructure.
Maponduan ti Philippine Digital Infrastructure Project (PDIP) babaen ti development assistance ti World Bank, ket gandat daytoy a papintasen ken pasaknapen ti digital broadband ti pagilian, nangruna kadagiti nasulinek a lugar, ken papigsaen ti cybersecurity.
Paset daytoy ti National Broadband Program nga insayangkat ti Department of Information and Communications Technology (DICT), a mangipatakder iti public broadband infrastructure network ti pagilian.
Daytoy nga impraestruktura ket buklen ti lima a paset: ti backbone network, middle-mile network, access network, network security, ken ti project management support.
COC ni Doc Willie Ong a para senador, impila ti asawana
Inlawlawag ni NEDA Secretary Arsenio M. Balisacan nga adu ti oportunidad nga inyeg ti broadband nga internet kadagiti Filipino, manipud panagobra iti pagtaengan agingga iti panagusar iti Artificial Intelligence (AI), ken online a panangilako iti produkto a mangpasayaat iti panagbiagda. (Xander Dave Ceballos/Manila Bulletin//Lito Hilidon/Bannawag)
