Ngumatngato latta ti Satifaction ken Trust Rating ni Presidente Ferdinand Marcos Jr., idinto a bumabbaba met ken ni Bise-Presidente Sara Duterte kalpasan ti panaglusulosna iti gabinete, segun iti Tangere survey a naiwayat manipud Hunio 18 agingga 21, 2024.
Maibatay iti resulta ti surbey, agtultuloy ti nangato a pannakapnek ken panagtalek ti tao ken ni Presidente Marcos iti maikadua a quarter ti tawen.
Imbatad ti Tangere a ngimmato ti satisfaction rating ti Presidente manipud iti 43%, ket nagbalin a 45%; kasta met ti trust rating-na manipud 56%, ket nagbalin a 58%.
Nagtaud daytoy iti Northern ken Central Luzon, manipud kadagiti agtawen ti 26 agingga iti 35.
COC ni Doc Willie Ong a para senador, impila ti asawana
Kalpasan ti panaglusulosna a kas DepEd Secretary, bimmaba met ti satisfaction ken trust rating ni Bise-Presidente (BP) Sara Duterte.
Manipud iti 52%, bimmaba ti satisfaction rating-na iti 50%; idinto a nagbalin a 58% ti trust rating-na, manipud iti 60%.
Segun iti datos ti Tangere, nagtaud ti distrust ken dissatisfaction rating ni BP Duterte iti Mindanao a support base-na.
Kadagiti naglabas a surbey, ni BP Duterte ti kangatuan.
Iti sabali a bangir, bassit laeng ti ngimmatuan ti satisfaction ken trust rating ni House Speaker Martin Romualdez.
Ngem nakaddidilaw ti nangato a trust rating ni katugtugawna a Senate President Francis Escudero.
Naikkan ni Sen. Escudero iti satisfaction rating-na a 51% ken trust rating a 60% kadagiti respondent manipud iti Metro Manila, Southern Luzon, ken Bicol Region. (Ellalyn De Vera-Ruiz/Manila Bulletin//Lito Hilidon/Bannawag)
