Kinompirmar ti Department of Justice (DOJ) itay Hunio 27, 2024 a pinatgan ti gobierno ti Timor-Leste ti ekstradision ni dati a Diputado ti Negros Oriental Arnolfo “Arnie” A. Teves, tapno mabista ti kasto daytoy iti Filipinas.
Inanamaen ni DOJ Assistant Secretary Jose Dominic F. Clavano IV a makaawiden ni Teves kalpasan a mapatgan ti kiddaw ti gobierno ti Filipinas a mabista koma ti kaso ni Teves iti mismo a pagilianna.
Naidarum ni Teves ken dagiti dadduma pay, iti 10 a kaso ti pammapatay (murder), 12 a kaso ti frustrated murder, ken uppat a kaso ti attempted murder gapu iti pannakapapatay ti 10 a tao, agraman ni Negros Oriental Gov. Roel Degamo, ken pannakadangran ti 18 a katao iti ili ti Pamplona idi Marso 4, 2023.
Nayallatiw ti kaso iti Manila, kas imbilin ti Korte Suprema.
Mangnamnama ni Marcos iti pannakaisubli ti panangipateg ni Pinoy iti arte a Filipino
Idi Setiembre 5, 2023, impaulog ni Regional Trial Court (RTC) Judge Merianthe Pacita M. Zuraek ti Branch 51, ti arrest order ni Teves ken dagiti kakaduana. Ngem saan a maipatungpal ti arrest order ni Teves ta addan daytoy iti ballasiw-taaw sakbay a maidarum.
Nagkiddaw ni Teves iti political asylum iti Timor-Leste, ngem saan a napatgan.
Idi Marso 21, tiniliw dagiti autoridad ti Timor-Leste ni Teves bayat nga agay-ay-ayam daytoy iti Top Golf Driving Range and Bar iti Siudad ti Dili, gapu iti red notice nga inruar ti International Criminal Police Organization (Interpol).
Kiniddaw ngarud ti Filipinas ti ekstradision ni Teves.
Kinuna met ni Atty. Ferdinand Topacio nga abogado ni Teves a mabalinda pay ti agapelar ti pangngeddeng ti korte ti Timor-Leste.
Malaksid kadagiti kasona a murder, frustrated murder, ken attempted murder, indeklarar pay ti Anti-Terrorism Council a maysa a terorista ni Teves ket naipilan ti kasona a terorismo iti DOJ. (Jeffrey Damicog/Manila Bulletin//Lito Hilidon/Bannawag)
