Nagbalinen a linteg itay Hunio 14, 2024 ti Republic Act (RA) No. 12006 wenno ti Free College Entrance Examination Act (FCEEA), a mangipaay kadagiti kualipikado nga estudiante iti libre a college entrance examination kadagiti pribado a kolehio ken unibersidad.
Kas sagudayen ti Article VI Section 27 ti 1987 Constitution, agbalin a linteg ti gakat a di pirmaan wenno i-veto ti Presidente kalpasan ti 30-aldaw a pannakaidatag daytoy iti opisinana.
Maibatay iti FCEEA, dagitoy dagiti estudiante a kualipikado iti libre a college entrance examination:
- Masapul a natural-born Filipino citizen;
- Karaman iti top 10 a porsiento ti graduating class;
- Karaman iti pamilia nga adda iti baba ti poverty threshold, segun iti NEDA;
- Agaplay iti college entrance exam iti ania man a pribado a kolehio wenno unibersidad iti Filipinas;
- Maragpatna amin nga alagaden ti pribado a pagadalan
Ti Commission on Higher Education (CHED) ti napusgan a mangikeddeng iti pannusa kadagiti mangsalungasing iti daytoy a linteg; ken mangbukel iti Implementing Rules and Regulations (IRR) iti las-ud ti 60-aldaw. (Argyll Cyrus Geducos/Manila Bulletin//Lito Hilidon/Bannawag)
