Tinulongan ti China Coast Guard (CCG) dagiti kameng Philippine Coast Guard (PCG) a nangisalakan kadagiti Filipino a mangngalap a nadadaelan iti bilog iti Bajo de Masinloc, paset ti West Philippine Sea (WPS), itay Hunio 29.
Bimtak ti makina ti bilog nga FFB Akio a paglugluganan ti walo a Filipino a mangngalap iti Bajo de Masinloc, segun iti report ti PCG.
Limmabas ti fishing boat nga FFB GG3, ket impakaammona daytoy iti PCG, a nangipatulod met a dagus iti barko a BRP Sindangan (MRRV-4407) a nangiwayat iti search and rescue operation.
Nasarakanda ti dandani lumneden a bilog iti 17-nautical miles a kaadayona iti Bajo de Masinloc
Mangnamnama ni Marcos iti pannakaisubli ti panangipateg ni Pinoy iti arte a Filipino
Segun ken ni PCG Spokesperson Rear Adm. Armando Balilo, nasaripatpatanda nga ip-ipusen dagiti barko ti CCG ken Chinese Navy ti BRP Sindangan agingga a nakagtengda iti yan dagiti mangngalap.
Insardeng dagiti CCG ti panangip-ipusda iti BRP Sindangan idi impakaammo ti PCG ti napasamak kadagiti mangngalap.
Kalpasan daytoy, inruar ti barko a CCG 3302 ti dua nga RHIB (rigid hull inflatable boat) ket nangidiayada iti tulong iti lumlumneden a bilog.
Segun iti PCG, dua a mangngalap ti nagsagaba iti second degree burn, nga agkasapulan iti madagdagus a pannakaagas.
Ingguyod met ti BRP Sindangan ti nadadael a bilog, ket manamnama a makadanon iti Subic, Zambales ita, Hulio 1.
Mangiwayat ti PCG iti imbestigasion tapno maammuan ti makagapu iti panagbettak ti makina ti bilog. (Martin Sadongdong/Manila Bulletin//Lito Hilidon/Bannawag)
