Saan koma nga agpatingga laeng iti sao ti panangsuportar dagiti pagilian a mangyeb-ebkas iti panangisakitda iti Filipinas no agranggas ti China iti West Philippine Sea.
Daytoy ti kinuna ni Armed Forces of the Philippines (AFP) chief of staff General Romeo Brawner Jr. itay Hulio 2, 2024 kas panangiparipiripna a masapul ti konkreto nga aksion dagiti kaaliado ti Filipinas.
Segun ken ni Brawner, pudno a napateg unay ti deklarasion dagiti nadumaduma a pagilian a suportaranda ti Filipinas, ngem kinunana a saan nga umdas ti sao laeng, no di ket masapul ti konkreto nga aksion.
Inlawlawag ni Brawner ti konkreo nga aksion nga ar-aramiden ti dadduma a pagilian kas iti joint sail, panagensayo, ken panangtulongda nga agsanay ken agpamoderno.
Mangnamnama ni Marcos iti pannakaisubli ti panangipateg ni Pinoy iti arte a Filipino
Addan insayangkat ti AFP a multilateral maritime cooperative activities (MCA) iti WPS a kadua dagiti pagilian nga Estados Unidos, Japan, Australia, ken Canada tapno maparayray ti panagtitinnulong ken agtalinaed a silulukat ti Indo-Pacific a rehion.
Imbatad ni Brawner a kadagiti umay a bulan, adda manen maaramid nga MCA a dar-ayan dagiti pagilian a France, United Kingdom, Germany, agraman New Zealand.
Innayon pay ni Brawner a naragsakda iti nasinged a relasion ti Filipinas ken Estados Unidos ken kadagiti kabangubang a pagilian kas iti Australia, Japan, ken South Korea. (Martin Sadongdong/Manila Bulletin//Lito Hilidon/Bannawag)
