Impakammo ti Department of Health (DOH) itay Hulio 3, 2024 ti bakuna kontra iti dengue a manamnama a sumangpet iti Filipinas ita a tawen.
Segun ken ni DOH Secretary Teodoro Herbosa, kinasaritanan ti Takeda Pharmaceuticals iti Japan maipapan iti produktoda a bakuna idi napan a tawen.
Kinuna ni Herbosa nga ur-urayenda a maaprobaran ti CPR (Certificate of Product Registration) ti Tekada Pharmaceuticals idinto nga ad-adalen ti FDA (Food and Drug Administration) dagiti dokumento nga impilada.
Gagangay a makatawen ti urayen ti pannakaaprobar ti CPR.
Mangnamnama ni Marcos iti pannakaisubli ti panangipateg ni Pinoy iti arte a Filipino
Inlawlawag ni Herbosa a saan nga amin ket mabakunaan, no di ket dagiti laeng kinaptanen ti dengue ti mabalin a maikkan iti bakuna, ta ti maikadua nga impeksion, wenno 'tay makunkuna a dengue hemorrhagic shock syndrome, ti parmeken ti bakuna.
Kinuna ni Herbosa a sakbay a mabakunaan, masapul nga agpasar nga umuna iti serology test tapno maammuan no kinaptan idan iti dengue idi.
Ngem impaganetget ni Herbosa a ti kangrunaan a solusion iti dengue ket ti panangparmek iti lamok a mangyakar iti daytoy a sakit.
Gapu iti daytoy, indagadagna iti publiko a sapulen ken dadaelen dagiti pagbalayan ti lamok tapno saanda nga umadu.
Kinuna pay ni Herbosa a no aggurigor ken agragatunok ti kudil ti ubing ket ipan a dagus iti doktor, ta amangan no addan dengue daytoy.
Itay Hulio 1, 2024, impakaammo ti DOH nga adda 77, 867 a kaso ti dengue manipud Enero agingga iti Hunio. (Sonny Daanoy/Manila Bulletin//Lito Hilidon/Bannawag)
