Intuding ni Presidente Ferdinand R. Marcos Jr. a kas special economic zone ti sumagmamano a parsela a daga iti Barangay Baculong iti Victoria, Tarlac.
Babaen ti Proclamation No. 623 a naipaulog itay Hulio 4, 2024 nabuangay ti 297,719-metro kuadrado a Victoria Industrial Park.
Maibatay iti Republic Act 7916 wenno ti Special Economic Zone Act of 1995, maibilang a kas special economic zone (SEZ) wenno ecozones dagiti lugar nga industrialisadon wenno addaan iti potensial a maparang-ay a kas agro-industrial, Industrial tourist/recreational, commercial, banking, investment ken financial center.
Mabalin nga imet dagiti SEZ ti maysa wenno amin dagiti: Industrial Estates, Export Processing Zones, Free Trade Zones, ken Tourist/Recreational Centers.
Mangnamnama ni Marcos iti pannakaisubli ti panangipateg ni Pinoy iti arte a Filipino
Dagiti lugar nga agbalin nga ecozone ket masapul nga iproklamar ti Presidente ken kas iti panangtingiting ken rekomendasion ti Philippine Economic Zone Authority (PEZA) maibatay iti feasibility ken engineering study dagitoy.
Segun iti PEZA, addan 419 nga ecozone iti Filipinas idi Abril 2023; 78 kadagitoy ti manufacturing economic zone; 297 ti information technology parks/centers; 17 ti tourism export enterprises; 24 ti agro-industrial economic zones; ken tallo ti medical tourism parks/center. (Darryl John Esguerra/PNA//Lito Hilidon/Bannawag)
