Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-28 a Paset)
PINAGRISIRIS ni Dex dagiti dakulapna idi ipakaammo ti management a mangrugin ti laban. Ti Warrior One ken Thunderbolt ti umuna nga aglaban.
“Apay, agnerbioska?” inkatawa ni Jong.
“Diak ammo!” insungbat ni Dex. Kimmita iti aglawlaw sa kinautna ti backpack-na. Inruarna ti botelia ti maysa nga energy drink a kakolkolor ti Coke sa intangadna.
Nagsaep ni Jong. “'Ba, amoy wrong spelling!” inyellekna.
NOBELA: Apo Baboy Party-List (6)
Impakuros ni Dex ti tammudona kadagiti bibigna sa tinaldiapanna dagiti kakaduada. ”Inkargak ti empe a tedda ni Elmer!” inyarasaasna.
“’Lika, Johnny, at manood muna tayo,” kinuna met ni Ella. “Matagal pa ang laban natin!”
Kimpet ni Ella iti siko ni Johnny idi rummuarda iti cockhouse. Dina inggagara, tinaldiapan ni Johnny dagiti kakaduada. Ngem kasla awan aniamanna kadagitoy ti inaramid ni Ella. Gagangay a panagpasig? Ket immanges laengen iti dakkel ni Johnny iti panangiturong ni Ella kenkuana iti ridaw ti ringside.
Di pay nabaraan da Ella ti nagtugawanda no ar-arigen, nagkuripaspasen ti Warrior idi agdissoda kalpasan ti damo laeng a panagsabatda iti aire iti Thunderbolt. Gapu ta saanen a nasken ti kario, tiniliw laengen ti sentensiador ti entry ti Thunderbolt, inyawatna iti handler sa insulbongna ti baina ti tadi daytoy. Inyuged met ti maysa a tao ti agpaderbi ti iskor ti Thunderbolt iti blackboard a naimuntar iti maysa a poste ti gradas.
“Thunderbolt, one win!” impakdaar met ti management iti kubong iti sidiran ti agdan ti gradas.
Maysa pay a tao ti management ti nangsukat iti paskin ti sumaruno nga aglaban: VVV Baby vs. Sarrat Pride. Ti umuna ti adda iti liamado idinto ta dehado ti maikadua.
Darisayen ti VVV Baby. Maysa nga agtutubo ti nangyuli iti gradas. Darisayen met laeng a puraw ti sakana ti Sarrat Pride. Lakay ti nangyuli iti daytoy.
Agpada iti kadakkel ken kinataraki dagiti manok ngem liamado iti pinnusta ti VVV Baby. Kasano ngamin ket makita dagiti tao a baak ti VVV Baby, agrutongen ti rupana ken agsaluyabyaben dagiti siksikna, ken pukol ti dua a ramayna, mangipakita a beteranon daytoy iti no manon a tawenna.
“Ania ngata, pumustaak? Kaykayatko ti dehado,” kinuna ni Ella.
“Sika, a. Para lang sa mga manok natin ang pera ko,” insungbat ni Johnny.
Ania ngarud, timmakder ni Ella tapno pumili kadagiti liamadista nga agyaw-awag iti pustada iti labananna. Ket naiturong ti atension dagiti tao ken ni Ella. Adda napa-wow, adda kasla nasulek iti lennek a pusegna nga ipaspasirip ti nakiting a blusana, ken adda met nagsultip. Iti ballasiw ti gradas a batog da Ella, kinalbit ti napampandek a lakay ti kaduana idinto ta naibagkatna ti patongna iti nagtugawanna.
“Ne, adda ni Ella, abalayan. Ania ket a lapsat daytoy nga ubingen, aya!” kinunana a kudkudkodenna ti sellangna.
“Kunak no napukawen ti el-mo kaniana, ‘balayan. Itay pay a nadlawko!” kinuna met ti nakutkuttong a bulonna a nagimukat sa kimmita ken ni Ella.
“Sika met, abalayan!” imlek ti napampandek. “Kakaisuna a kabaelanna pay met ti ag-land of the morning!”
“No lukagennaka a mapan iti banio!” insutil latta ti nakutkuttong.
Bimmara ti pispis ti napampandek, ngem saanen a nagtimek. ‘Ninam, abalayan, inridisna laengen iti unegna.
Damo pay laeng a binnangga, naipangeten ti tadi ti Wala iti luppo ti Meron. Nagriaw dagiti dehadista idi naisurot ti Meron iti panagatras ti Wala ta dina nauksot ti tadina.
Ngem di ingginggina ti Meron ti sugatna idi mauksot ti tadi iti luppona. Dimmarup ket rimmasuk ti Wala. Saan nga intuloy ti Meron ti idadarupna. Apagdisso ti Wala, pinitik ti Meron. Nagriaw dagiti liamadista idi naiwekwek ti tadi ti Meron iti kilikili ti Wala. Nagkuyegyeg a dagus ti Wala.
“Malas! Damo pay met ngarud,” kinuna ni Ella. Kinunesna ti sangaribuna sa imbatona iti kinapinnustana. “Tama ka, Johnny. Ti manoktayo laengen ti pustaantayo.”
Iti nagtugawanda, agkinkinnatawa manen dagiti agabalayan.
Dua pay a liamado ti nangabak sa simmublat ti Wala iti maikalima. Kinita ni Ella ti relona a bulonna a timmakder. “Labas na tayo. Magpapatari na!” kinunana ken ni Johnny.
Nadiram-osanen ni Dex ti manokda idi makadanon da Ella iti cockhouse-da idinto ta am-amirisen ni Elmer ti tadem dagiti tadida. Kinapudnona, nakapilin iti ikabilna a tadi dagiti dua nga umuna, ngem di pay nakadesision para iti maikatlo.
Ngem kalpasan ti maikawalo a laban, impakdaar ti kasador, kas imbilin ti management, ti break wenno panaginana. Rimsua ti karibuso ken arimbangaw dagiti umulog iti bleachers ken ringside a mapan agpaksay ken agmerienda.
Pagam-ammuan, nagsul-oy ni Dex a bulonna a nangapput iti ulo ti iggemna a manok. “Nakauy-uyong metten!” kinunana.
Nagdanag ni Elmer idi makitana dagiti dungir kadagiti takiag ni Dex. Nalagipna ti maysa a napasamak iti naminsan a nakigaliera dita Pateros. Idi maidisso ti handler ti manokna, sinango ti manok ti amona. Naimbag ta nakataray ti handler. Ngem kinamat ti manok ti handler. Naimbag ta nairikep a dagus ti handler ti kubongna. Uray la nagudua ti tadi iti pigsa ti danog ti manok iti fiberglass a kubong.
Nauyong pay itan ti manok, anianto la ketdin no mapatomar iti LM? Kinita ni Elmer ni Ella. “Grabe ‘ta manok. Delikado a sika ti mangibbet. Siak laengen ket sikanto kadagita dua,” kinunana.
“Danagmon! Kayang-kaya. Siak ti makaammo!” Nagkatawa ketdi ni Ella. “Saanen a pasippitan ken saanen a pagtomaren iti LM.”
Kinita ni Elmer dagiti kaduada. Agpapada dagitoy nga agduadua ti langada.
“Huwag na, boss. Si Elmer na lang,” kinuna ni Dex.
“Wen met ngamin, boss,” impasaruno ni Jong. “Delikado a talaga!”
Nagsay-a ni Johnny ta kasla adda nayapin iti karabukobna. “Huwag na lang mahal, este, El. Kua…” di naituloy ni Johnny ta uray la naipdokan iti nailaw-anna nga inyawag ken ni Ella. Kinitana da Dex ken Jong. Timmallikud dagitoy ket nawagwag dagiti abagana iti di simngaw nga ayek-ekda. Napaisem met ni Elmer.
“Maysaka met!” nagkatawa ni Ella. “Siak ti mangibbet. Agbuyakayo lattan. Siak ti makaammo.”
“Baka kamatennaka ngamin,” kinuna latta ni Elmer. “Kayatmi laeng a mailisika iti desgrasia.”
“No sika, dinakan sanguen?” Nagkatawa ketdi ni Ella. “Si Elmer naman! Parte amin ti ay-ayam dayta!”
“Husto ni Elmer. Baka…” Di naituloy ni Johnny ta minulagatan ni Ella. Ket no ania la ditan ti tinangtangadna.
Kalpasan ti nasurok a tallopulo a minuto, naipakdaar a maituloy ti aksion. Nagdardaras a simrek dagiti tao iti ringside idinto a nagiinnuna nga immuli dagiti mapan iti bleachers. Saanen a nagsubli da Ella ken Johnny iti ringside.
Apagbiit ti laban ti maikasiam a soltada. Pagsayaatanna, ammo ni Elmer ti kalidad dagiti sarunuenda nga entry isu nga inawisnan ni Dex iti puesto dagiti labahero.
Inwaras ni Elmer ti panagkitana idi makastrekda iti gaffers’ room. Nagsabat ti panagkitada ken Anding a kalleppasna a nangipuesto iti tadi ti maysa a manok ni Bitangcol a sarunuenda a laban. Manok ni Gino ti kalabanda.
Ipupueston ni Elmer ti tape iti gurong ti manokda idi asitgan ni Anding. Tinapik ni Anding ti abaga ni Elmer.
“Kasano, kailian?” kinuna ni Anding. Kiniddayanna ni Dex.
Naawatan ni Elmer ti turong ti kinuna ni Anding. “Okey lang. Umuna a laban,” insungbatna.
Tinapik pay naminsan ni Anding ni Elmer ket tinurongnan ti ridaw.
Sumsumreken iti ridaw ti gradas dagiti handler da Bitangcol ken Gino idi dumteng da Elmer iti pilaan. Nadanondan dita ti kalabanda, ti entry ti Stingray ni Tobias ti Cagayan. Saan nga am-ammo ni Elmer ti nagiggem iti manok ni Tobias, ngem kiniddayanna latta daytoy.
“Ibagam ken ni Ella a datayon ti sumaruno,” kinuna ni Elmer ken ni Dex. Innalana ti manokda. Tinuktok ti manok ti takiagna, ngem saan a makakinnit ta inikkanda iti tape ti sippitna.
Pinerreng ni Dex ni Elmer. “Isu kadi a talaga ti mangibbet? Baka ania ti mapasamak. Sigurado a datayo ti babalawen ni Boss Bianong,” kinunana.
“Isut’ kunana. Ngem bareng agbaliw ti panunotna iti last minute.”
”Ti LM?”
“Saanen. Agresibo unayen daytoy!” kinuna ni Elmer a bulonna a nagsul-oy ta tinuktok manen ti manok ti takiagna. Nupay kasta, siaanus latta a nangamloy iti ulo ti manok. “Huwag kang makulit. Mapapalaban ka na!” kunam la no makaawat ti manokda a kinasaritana.
Imlek la ket ngarud ni Dex. “Ket tinagalogmo pay!”
“Siempre, napessaan ken dimmakkel iti Katagalogan isu a Tagalog met ti loko. No idiay koma Ilokos wenno Cagayan, Ilokano wenno Ibanag met isuna!”
Nagtugaw ni Elmer iti sango ti kalabanna. “Kaggi ka ba?” sinaludsodna iti kataebna a pagarupenna a handler ti Stingray.
Nasugpet ti isem ti kalabanna. “Awan dumam iti dadduma a taga-Ilokos!” kinunana. “Kaggi, kunada kadagiti taga-Cagayan. Ilokano ken Ibanag-kami a taga-Cagayan. Itawes ti dadduma. Ngem Cagayano-kam' amin!”
Nabainan ni Elmer. “Taga-Cagayan-ak met, kailian,” napitpit ti isemna. “Ania ti ilim, aya?”
“Santa Teresita. Kaarrubak ni Tobias. Siak ti handler-na.”
“Agkakalugaran aglalaban!” nagkatawa ni Elmer.
“Manok laeng ti aglalaban. Iti ruar ti ring, agkakaduatayo. Wen gayam, siak ni Buddy!”
Inawat ni Elmer ti dakulap ti padana a handler. “Elmer, taga-Allacapan! Isport lang, Buddy!”
“’Tay kunakon, manok laeng ti aglalaban!”
Isu met a dumteng da Ella ken Dex. “Magkakilala kayo?” kinuna ni Ella.
“Siya ang handler ni Tobias— si Buddy. Provincemate ko siya. Buddy, siya ang boss namin,” kinuna met ni Elmer.
Timmakder ni Buddy. Pinababa-pinangatona a kinita ni Ella. Sa pinababana manen. “Kumusta kayo, madam!” kinunana ngem naisagud ti panagkitana iti lennek a puseg ni Ella.
Nadlaw ni Ella ti turong dagiti mata ni Buddy ket inisemanna ni Elmer. Isu met a bumtak ti makatitileng a riaw ken palagapag.
“Bitangcol, one point!” impakdaar ti kasador.
Kinita ni Elmer ni Ella. “Ano?” Kayatna a penken no saanen a nagbaliw ti desision ni Ella nga isu ti mangibbet iti manokda.
“Siakon!” nakataltalged ti timek ni Ella. Innalana ti entry-da ken ni Elmer ket simmarunon ken ni Buddy iti ridaw.
Innala met ni Elmer ti para pasippit ken ni Dex. “Tulbekanyo ti cockhouse no agbuyakayo,” imbilinna ket simrek metten iti ridaw ti gradas.
No kasano ti pigsa ti sipsipat ken sultip a maipasabat ken ni Ella iti Sta. Ines no umuli iti ring, doble iti Sta. Monica. Timmakder pay ti dadduma a nagpalakpak a pakairamanan dagiti agbalayan.
“Palakpakan ang reyna! Palakpakan ang reyna!” kinuna ti kasador.
Nagdir-i ken nagsisipat met dagiti tao.
“Talaga a sabali ti ‘dating’ daytoy nga ubing, abalayan!” kinuna ti napampandek kadagiti agabalayan idinto ta kunam la no agan-anup iti tibong ti palakpakna. “Seksi la ngaruden, naidumduma pay ti karismana!”
“Makapagartem, kunam kadin, ‘balayan!” kinuna met ti nakutkuttong.
“Pudno. Ngem nasaysayaat no saanmon a baliksen, abalayan!” kinuna ti napampandek sa impapainayadna ti nagtugaw idi nadlawna nga isuda laengen ti nakatakder ken agpalpalakpak iti ringside.
Ammo da Ella ken Elmer a dehadoda iti pusta ket nagtarusda iti puesto ti Wala. Inturong met ni Tobias ni Buddy iti lugar ti Meron idi makauli iti ring. Ni Tobias a mismo ti mangpasippit iti manokna.
“Saantan a pasippitan. Nauyong unayen,” kinuna met ni Elmer ken ni Ella. Imbabana ti para pasippit. “Ipakamatmo!”
Nagtungpal ni Ella. Ginuyod ni Elmer ti ipus ti para pasippit ket pinasanudna. Inipus met ni Ella ti entry-da ket uray la pumlatok ti nadam-eg a daga nga ikup-ayna iti panangkamatna iti para pasippit.
Iti Meron, namitlon a pinasippitan ni Tobias ti panga ti manokna ket namindua metten iti luy-ongna. Ngem awan ti makita dagiti pumapago a kinaagresibo ti lasak a kayatda a makita iti pustaanda a manok. Ket nagkontra barata. Ti manok ni Ella ti nagliamado iti pinnusta.
Apagbiit laeng a nagitudo ti kasador kadagiti am-ammona a dehadista. Idi sangapulo a ribu laengen tapno mapataran ti pusta ti Meron, nagseniasen ti kasador.
“Sige, larga na!” kinuna ti kasador ket inseniasna nga umulog iti ring dagiti awan bibiangna dita.
Sakbay a pinanawan ni Elmer ni Ella, kinunana: “Diretso ti panangibbetmo iti direksion ti kalabanna. No idisso ti kalaban ti manokna iti abay ti uged, idissom met a dagus iti uged ti manokmo ket dagdagusem ti umadayo. Serraam a dagus ti kubongmo no makastrekka. Ania man ti mapasamak, no aginnuray dagiti manok wenno aginnaddayoda, saankan a rummuar. Bay-am a ti sentensiador ti mangtiliw kadagiti manok.”
Inikkat ni Elmer ti tape ti sippit ti manokda. “Good luck,” kinunana a bulonna a timmallikud.
Pagsayaatanna, nakipinnaayat ni Buddy. Ngem kas itay dakulapenna ni Ella, naisagud manen ti panagkitana kadagiti muldotan a luppo ken lennek a puseg ni Ella. Afounayen, diallo, nakunana iti unegna ket nariknana nga immirteng ti pus-ongna.
Nadlaw ni Ella ti langa ni Buddy. Indissona a dagus ti manokna iti labes ti puraw nga uged sa sikakarting a nagturong iti kubongna. Inrikepna a dagus ti kubongna.
“Idissomon, laglag!” imbugtak ni Tobias iti handler-na. “Yadayom!”
Nagriaw met dagiti agbuybuya ta nakastreken ti manok ni Ella iti baet dagiti puraw nga uged.
“Ibbatamon, tanga!”
“Ano ba? Bitawan mo na! Una kang mamamatay diyan!”
Isu pay la ti panagbalaw ni Buddy. Ngem awanen ti gundawayna a tumaray a mangyadayo iti manokna. Arintarayenen a dumarup ti manok ni Ella. Ania ngarud, inibbatanna lattan ti manokna sa timmaray a nagkamang iti kubongna.
Apagdisso ti lasak, inistreyt ti darisayen ket nagriaw dagiti agbuybuya idi nakalawlawag a nakitada a limmumlom ti tadina iti pitso ti lasak.
“Banat pa! Banat pa!” inyikkis ni Ella ket winagwagna ti kubongna.
Ngem di ingginggina ti lasak ti sugatna, ken awan man la ti nagtedted a darana. Dimmanog. Simmabat ti darisayen ket uray la nagkiet ni Elmer iti agdan ti gradas idi napasikig a nagdisso ti manokda. Idi tumakder, leppayen ti kanigid a payakna.
Iti ringside, nakammet ni Dex ti tumeng ni Jong idinto ta dimmam-eg ti teltel ni Johnny. Iti nagtugawanda, nabennat ti tengnged dagiti agabalayan a nangtannawag kadagiti manok.
“Sinalbag! Maabak sa ti manok ni Ella, abalayan!” kinuna ti napampandek.
“Ti pay la payakna ti baldado, ‘balayan,” pammatibker met ti nakutkuttong a lakay.
Iti nagtugawanna, nagtalinaed a naulimek ni Tobias. Pudno a dakkel ti maitulong ti payak iti pannakilaban ti manok ket dakkelen a puntos ti naksay iti kalaban ti manokna. Ngem adda amakna, amangan no immuneg iti pitso ti tadi ti kalabanda ket adda nadalapus a lalaem ti manokna ket riknaennanto no bumaybayag ti laban.
Timmayab ti lasak ket nagriaw dagiti liamadista idi nagampayag sa nagrikus iti aire a nangbatog iti darisayen. Ngem siaalista a limias iti kanawan ti darisayen ket nalisianna ti parakapak ti lasak.
Ul-ulodenna ti payakna, tinaray ti darisayen ti lasak. Ket sakbay a mapasabtan ti lasak ti kalabanna, natukmaan ti darisayen ket naggubal-nagkinnuripaspasda. Saanen nga agpulsot ti riaw ken palagapag dagiti agbuybuya.
Iti kubongna, agtiltil-ay ni Ella a mangtantannawag kadagiti manok ngem kasla nasarait dagiti bibigna. Ammona ngamin nga ania man a kanito, agkuripaspas ti maysa kadagiti manok ta imposible nga awan ti mailumlom a tadi iti panagkinnapet dagiti manok. Iti met ringside, no kuan ibagkat da Dex ken Jong ti patongda ngem dida met patuloyen ti tumakder. Iti abayda, itantanamitim ni Johnny ti kararagna.
Iti bangir a kubong, agparawen ni Buddy iti panagririawna. No kuan danogenna ti angin, ngem ni Ella met ti kitkitaenna.
Nagtalna dagiti manok ket nagariwawa dagiti agbuybuya.
“Karyo! Karyooo! Tatanga-tanga ka pa, bobo!”
Tinukmaan ti sentensiador ti bukot dagiti manok ket inkariona. Uray la nagkulipagpag dagiti manok iti panagsinnippitda. Indisso ti sentensiador dagiti manok.
Dimmanog ti lasak. Saan a nakalisi ti darisayen ket naubon ti kanawan a luppona. Nupay kasta, natukmaanna ti lasak. Ginuyodna sa nagdata a nangkuripaspas iti lasak. Nagriaw manen dagiti agbuybuya.
Ngem kellaat a nagtalna dagiti manok. Akin-uneg ti darisayen a sinakayan ti lasak nga agkurkuridemdem a lumitemen ti rupana.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
