Dinagadag ni Department of the Interior and Local Government (DILG) Secretary Benjamin “Benhur” Abalos, Jr. ni Kingdom of Jesus Christ (KOJC) Pastor Apollo Quiboloy a sumukon iti autoridad, ken sanguenna dagiti kasona iti korte.
Daytoy ti impakdaar ni Abalos itay Hulio 8, 2024 kalpasan nga imbatadna nga adda PhP10 a milion a gunggona iti siasino man a makaited iti impormasion tapno matiliw ni Quiboloy.
Adda met PhP1 a milion a gunggona tunggal maysa kadagiti lima a kakadua ni Quiboloy a naidarum iti kaso a child abuse ken qualified human trafficking, nga isu da Cresente Canada, Paulene Canada, Ingrid Canada, Jackielyn Roy ken Sylvia Cemanes.
Kinuna ni Abalos a nagur-or ken nangidiaya iti PhP15-milion dagiti pribado nga indibidual a maup-upayen iti di panangikankano ni Quiboloy iti turay.
Panagusar iti social media kadagiti pagbaludan, imparit ti BuCor
Segun ken ni Abalos, naikkanen iti gundaway ni Quiboloy a mangipakita iti panagraemna iti korte iti Filipinas, idinto a supsupiatenna ti autoridad ti International Criminal Court (ICC) iti lokal a korte.
Nagballaag ti autoridad kadagiti mangilemlemmeng ken ni Quiboloy, ta mabalinda a maidarum iti obstruction of justice, no salungasingenda ti Presidential Decree (PD) 1829. (Manila Bulletin//Lito Hilidon/Bannawag)
