Imbilin a dagus ni Department of the Interior and Local Government (DILG) Secretary Benjamin “Benhur” Abalos, Jr. itay Hulio 22, 2024 ti pannakasukimat ken pannakatiliw dagiti nagiwaras iti peke a video ni Presidente Marcos Jr. (PBBM) iti social media.
Minandar ni Sec. Abalos ken ni Philippine National Police (PNP) Chief Gen. Rommel Marbil a mangbukel iti task force a mangpalutpot no asino dagiti nangaramid ken nagiwaras iti video a mangiparparipirip nga agus-usar iti droga ni PBBM.
Kinuna ni Abalos a gandat dagiti nangiwaras iti video a dadaelen ti maikatlo nga State of the Nation Address (SONA) ti Presidente.
Segun ken ni Abalos, buklen ti task force dagiti kameng ti Directorate for Investigation and Detective Management ti PNP, ken ti PNP Anti-Cybercrime Group (ACG).
COC ni Doc Willie Ong a para senador, impila ti asawana
Iti sabali a bangir, kiniddaw ti Department of National Defense (DND) iti Estados Unidos nga imbestigaranda koma dagiti nangaramid ken nangiwaras iti parbo ken malisioso a video nga immuna a naipabuya iti "Maisug" rally a naangay iti Los Angeles, California.
Ti Maisug Rally ket panagtataripnong dagiti mangsupsuportar ken ni dati a presidente Rodrigo Duterte.
Segun ken ni DND Spokesperson Director Arsenio Andolong, nalawag a ti naipabuya a “pulvoronic video” iti Maisug Rally iti Los Angeles ket maysa a panangdadael iti administrasion ni PBBM. (Aaron Recuenco/Manila Bulletin//Lito Hilidon/Bannawag)
