Namnamaen ti publiko nga idatag ni Presidente Ferdinand R. Marcos Jr. iti maikatlo nga State of the Nation Address (SONA) ita, Hulio 22, 2024, dagiti isayangkatna tapno maitag-ay ti biag dagiti umili, maparang-ay ti ekonomia, ken mataming dagiti nadumaduma a parikut ti pagilian.
Segun iti surbey nga insayangkat ti OCTA Research manipud Hunio 26 agingga iti Hulio 1, 2024, ti implasion (wenno ingingina ti presio dagiti magatang) ti kangrunaan a nailian a pakaseknan ti 65 a porsiento dagiti 1,200 a Filipino.
40 a porsiento met ti nagkuna a parikutda ti pannakagun-od iti nalaka a magatang a taraon kas iti bagas, natnateng, ken karne.
33 a porsiento ti nagkuna a tamingen koma ni PBBM ti panagngato iti sueldo.
Ilocos Sur, Umuna a Puesto iti Regional SubayBAYANI Awards
Iti sabali a bangir, binaonen ti Philippine National Police (PNP) ti nasurok a 22,000 a polis para iti SONA.
Binaon pay ti PNP ti Task Force Metro Manila Shield a mangsalaknib iti National Capital Region (NCR) kadagiti serioso a pangta, idinto a naipatungpalen ti gun ban idi Hulio 20.
Iti biang ti Metropolitan Manila Development Authority (MMDA), nasurok a 1,300 a polis ti mangimando iti trapiko, nangruna kadagiti lugar ken kalsada a maiserra.
Kinuna ni PNP spokesperson Col. Jean Fajardo nga awan met ti serioso a pangta iti SONA ni PBBM, ngem binalakadanna dagiti agprotesta a bantayanda dagiti bagbagida tapno saan ida a mastrek dagiti tattao a mangpataud iti riribuk. (Ellalyn De Vera-Ruiz/Manila Bulletin//Lito Hilidon/Bannawag)
