Insaad ti Philippine Atmospheric, Geophysical and Astronomical Services Administration (PAGASA) ti Signal No. 1 iti sangapulo a lugar iti Luzon gapu iti Bagyo Carina (international name "Gaemi") ita, Hulio 23, 2024.
Itay 5:00 ti parbangon, naisaad iti Signal No. 1 dagitoy a lugar: Batanes; Babuyan Island; ti amianan ken daya a paset ti Cagayan (Santa Ana, Gattaran, Baggao, Peñablanca, Lal-Lo, Gonzaga, Buguey, Santa Teresita, Aparri, Camalaniugan, Ballesteros, Allacapan, Abulug, Pamplona, Claveria, Sanchez-Mira, Santa Praxedes, Lasam, ken Alcala); ti daya a paset ti Isabela (Divilacan, Palanan, Maconacon, Dinapigue, Tumauini, Ilagan City, San Mariano, Cabagan, San Pablo, ken Santa Maria); ti amianan a paset ti Apayao (Calanasan, Luna, Pudtol, Flora, ken Santa Marcela); ti amianan a paset ti Ilocos Norte (Pagudpud, Bangui, Adams, Dumalneg, Burgos, ken Vintar); ti amianan a paset ti Aurora (Dilasag, Casiguran); Polillo Islands; Calaguas Islands; ken ti amianan a paset ti Catanduanes (Pandan, Bagamanoc, Panganiban, Viga, Gigmoto, Caramoran).
Makarikna iti napigsa nga angin dagiti adda iti Signal No. 1.
Napigsa agingga iti nakaro a tudo iti Batanes ken Babuyan Island, idinto a kalalainganna agingga napigsa a tudo ti marikna iti Ilocos Norte, Ilocos Sur, La Union, Abra, Benguet, Apayao, ken Cagayan.
COC ni Doc Willie Ong a para senador, impila ti asawana
Segun iti PAGASA, nasaripatpatan ti kaadda ni Carina, 380 a kilometro (km) iti daya ti Aparri, Cagayan, nga addaan iti kapigsa a 130 kilometers per hour (kph) iti asideg ti sentrona, ken pugso a 160 kph.
Agpalaud ti bagyo iti kapardas a 10 kph.
Papigsaen ni Carina ti abagat a mangyeg iti tudo iti dadduma pay a paset ti Luzon kas iti Metro Manila, Oriental Mindoro, Romblon, Rizal, Laguna, Pampanga, Tarlac, Nueva Ecija, Bulacan, Aklan, Antique, kasta met iti Western Visayas, Bicol Region ken Northern Samar.
Manamnama a rummuaren ti bagyo iti Philippine Area of Resposibility inton Hulio 25. (Elallyn De Vera-Ruiz/Manila Bulletin//Lito Hilidon/Bannawag)
