Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-30 a Paset)
AD-ADDAN ti suron ni Johnny iti ‘doktor.’ Kinitana da Ella ken Elmer. Nagrukob ket kinarawana ti manok iti kulongan. Immanges iti dakkel sa linintegna ti takderna.
“Awan gayamen ti serbi ti pannakaagasna,” kinuna ni Dex.
“Sumabalitayon iti pagpaagasan. ‘Tay saan la a ti tangdan ken baratona ti kitkitaenna,” kinuna met ni Johnny.
“Husto ni Johnny. Agduaduaak pay iti panagagas ni daydiay,” kinuna met ni Jong. “Naminsan a nagbantayak, adda lumabaga a crepe paper nga inyuperna iti danum sa pinespesna.”
Galiera Queen (MAUDI A PASET)
Pinerreng ni Ella ni Jong. “Anong ginawa niya sa tubig?”
“Nilagay sa maliit na bote.”
Nagatap ni Elmer. “Pulang crepe paper, binabad sa tubig at piniga?” Nagtungtung-ed. “Kasla mertayolet ti danum. Saan ngata a daydiay ti pangdaldalusna iti sugat?” kinunana.
Nagkatek ni Dex. “Posible. ‘Bag la ketdin ta pagtomtomarek ‘ti antibiotics dagiti manoktayo.”
“See? Idi pay damo, idi makitak ti kinarugit dagiti alikamenna, agduaduaakon kenkuana!” impasaruno ni Johnny.
Nagtungtung-ed ni Ella. Impisok met ni Dex ti natay a manok iti plastik a pagkarkargaanna. Isu met a bumtak ti makatitileng a riaw ken palagapag.
“Nangabak ti dehado. Talo si Bitangcol!” Pimgaak ni Elmer. Nalagipna ti dawdawaten ni Anding. Nabang-aran.
“Isaaa…”
Naputed ti panagbilang ken panagkompas dagiti tao. Dandani di umanges ni Elmer iti panagurayna.
Pagammuan la ta bimtak ti nakapkapsut a riaw ken palagapag. Ad-addan a tinengngel ni Elmer ti panagangesna.
“’Kala nyo, ha! Karyo!”
“Isa! Dalawa!” Ket nalmes iti riaw ken palagapag ti panagbilang ti dadduma nga agbuybuya.
Nangabak ni Bitangcol? Arintarayen a rimmuar ni Elmer. Apagisu a makadanon iti sango ti pilaan idi rummuar ti handler ni Bitangcol a nakatapaya iti natay a manokda. Agkatkatawa daytoy ket ammo lattan ni Elmer a nangabak ni Bitangcol. Nakasippit siguro, naisipna.
“Bitangcol, two wins!”
Bimtak manen ti dir-i ken sipsipat.
Agsubli koman ni Elmer iti puestoda idi rummuar ni Anding iti ridaw. Tinapik daytoy ti abaga ni Elmer, kiniddayanna sa sinurotna ti kaduana a nangyulog iti natay a manokda.
“Totoo bang panalo si Bitangtcol?” impasabat ni Ella ken ni Elmer idi agsubli ti naud-udi iti cockhouse-da.
“Wen, pang-championship na rin. Uppattayon,” insungbat ni Elmer.
“’Sino ti maysa?” sinaludsod met ni Dex.
“Taga-Project 4, entry ti Rising Star. Kalabanna ti entry ti Arian. No bearing para iti Arian ta maymaysa pay ti nangabak a manokna, ngem baka madesgrasia ti Rising Star. Nagkampeon ti Arian dita Meycauayan itay nabiit.”
Laban dagiti awanen ti tiansada iti championship dagiti simmaruno ngem kaskasdi a naiget ti risiris. Adda dagiti makasippit laeng a mangabak, adda met dagiti saanen a makakunail iti kinagrabe ti sugatda ngem abotan ida ti sangapulo a minuto ket maitabla. Ken maymaysa ti nakalusot iti maikadua a labanda—ti maikadua a manok ti Sta. Teresita Warrior, sabali pay nga entry ni Tobias.
“Asino ngata ti maudi a kalabantayo?” nakuna ni Dex.
“Uray asino, agtalekak iti manoktayo,” insungbat ni Jong.
“Innak kitaen,” kinuna ni Elmer a bulonna a rimmuar.
Alas onsen. Naaprosan ni Johnny ti tianna. Kinitana ni Ella. “Kain muna tayo,” kinunana.
Ngem sakbay a makapanawda, dimteng ni Elmer. “Ni Tobias gayam ti nakaiskediul a maikatlo a kalaban ni Gino,” impadamagna. “Ni Bitangcol met ti kalabantayo!”
“Okey lang! Inabaktay' idin, abakentay' manen dayta a laklakayan!” inkatawa ni Dex.
Saan a nagtimek ni Elmer. Kinitana ni Ella. Nakataltalged met ti isem ti balasang a kumitkita kenkuana. Nalagipna ti kiddaw ni Anding.
“Magandang laban ito, mga kaibigan!” kinuna ti kasador. “Magkakampeon kaya muli si Mister Gino? Papayagan kaya ng Warrior ni Mister Tobias? At eto pa, mga kaibigan. Labanan nina Queen Ella at Mister Bitangcol ang susunod. Abangan!”
“Manood muna tayo!” kinuna ni Ella.
Ni Johnny laeng ti simmurot ken ni Ella.
Immanges iti dakkel ni Elmer. “’Maykan,” tinung-edanna ni Dex. “Agbantayka laengen, Jong.”
Masadsadut a palakpak ti nangsabat kada Tobias ken ti handler-na idi umulida iti gradas. Nagtarusda iti puesto ti Wala ta ammoda lattan a dehadoda. Darisayen a bumerde ti gurongna ti manokda.
Saan a nagbayag, immuli metten ti agtutubo a handler ni Gino ken ti nagubba iti pagpasippitda. Brown red ti manokda. Dir-i ken makatitileng a palakpak ti naipasabat kadakuada.
Iti gaffers’ room, nadatnganen da Elmer ken Dex da Anding, ti labaheroda ken ti para iggem iti manok
“Pare!” Nagwagis ni Anding. “Komusta? Ayos ba?” Nakabagbagas ti kiddayna.
“Okey lang, pare!” insungbat ni Elmer. One hundred fifty thousand? Immanges iti dakkel. Agtigtigerger dagiti ramayna iti panagpilina iti ikapetna a tadi ti manokda.
Nakadlaw ni Dex. “Agnernerbioskan sa, sir!” inyayugna sa nagkatawa. “Ita man pay? Kabutengmon sa ni Bitangcol ket napadasantay' metten nga inabak!”
“Ako pa?” Nagkatawa iti namaga ni Elmer. Inrukodna ti iggemna a tadi iti gurong ti manokda.
Iti ring, paspasippitan ni Tobias ti manokna idinto nga agpimpinnasikad ti handler ni Gino ken ti para pasippitna.
“One hundred ang diperensiya!” impakdaar ti kasador. Binatoganna dagiti adda iti ringside. “Padios, singkuwenta ka na total marami kang dalang dollar from Canada!”
Nagngilangil ti naitudo. “Sanlibo lang. Nagpapagawa ako ng bahay!” kinuna daytoy.
“Kuripot!” adda nangisutil.
Nagkakatawa dagiti tattao ket kasta unay ti tadem ti kusilap ni Padios a nangiwaras iti panagkitana. “Bakit, napupulot lang ba ang dollar sa abroad?”
Ad-addan ti katawa ken kantiaw dagiti tao. Nupay kasta, nagintutuleng laengen ni Padios.
Immakar ti kasador. “Freddie Lazar, beinte ka. Bosiong, beinte. Rolly beinte." Ket iti no namin-ano a panagitudo ti kasador, nalitupan met laeng ti pusta ti dehado. Ania pay, naibuang ti ariwawa dagiti liamadista a mangyawag iti pustada.
Iti nagpuestuanda, saan nga agtunos dagiti agabalayan iti pustaanda.
“Padata nga Ilokano ni Tobias, ngem narigat sa nga abakenna ni Gino, abalayan,” kinuna ti napampandek.
“’Su ngarud, ‘balayan,” kinuna met ti nakutkuttong. “Naabak ti immuna a manokna, a, ngem di met umanay daydiay a pagbatayan ‘ti kalidad dagiti entry-na. Kitaem, nangabak ti maikadua a manokna.”
Kinudkod ti napampandek ti ulona. “Saantan sa pay la a pumusta, abalayan,” kinunana.
“Dayta met ti pampanunotek, ‘balayan,” insungbat ti nakutkuttong.
Di ammo ni Ella no simpatia wenno ti suronna ken ni Gino ti mangidurduron kenkuana. Ngem ti Sta. Teresita Warrior ti kayatna a pustaan. Nupay kasta, nagtalinaed a nakatugaw a dumdumngeg iti innawag.
Kas namnamaen, kimmaro ti pannakadehado ti manok ni Tobias. Ket idi makangngeg ni Ella iti awag a sampu-anim, sinutsotanna a dagus ti kristo. Sineniasanna. Nagtung-ed ken insenias met ti kristo ti panangawatna iti karit ni Ella.
Rimmasay ti awag dagiti liamadista. Agingga iti sineniasan ti timer ti sentensiador.
“Baba na, baba na!”
Nagal-aludoy nga immulog iti gradas dagiti awan bibiangna dita. Simmaruno a bimmaba dagiti para pasippit. Nagbati ni Tobias ta isu gayam ti mangibbet iti manokna.
Iti gaffers’ room, natadianen da Anding ti manok ni Bitangcol. Sakbay a rimmuar, dinagas ni Anding a tinapik ni Elmer. “Sige, pare, thank you!” kinunana.
Naawatan ni Elmer ti kayat a sawen ni Anding, ngem saanen a simmungbat. Kinita met ni Dex ni Elmer.
“Apay nga agyamyaman?” kinuna ni Dex.
“’Mok man!” insungbat ni Elmer ngem dina kinita ni Dex. Imparabawna ti tadi iti nakupinkupin a tape nga aw-awaganda iti sapatos sa sinirigna ti direksion ti tirad ti tadi. Saan a mapnek, binaliwanna ti puesto ti tadi. Namitlo, namimpat a binaliwanna sa rinugianna a pinatapatan iti tape. Idi maipuestona ti tadi, sinirigna manen ti direksion daytoy sakbay nga insulbongna ti bainana. Pinatapatanna iti nalabaga a tape ti kanawan a gurong ti manok. Kalpasanna, kinautna ti alkohol iti bag ni Dex, binukbokanna ti dakulapna sa inlabona iti saka ti manok. Di pay napnek, innalana ti plastik a naglaon iti danum a nalaokan iti nangyuperan ni Dex iti ngipen ti kimat (uray saan a mamati iti daytoy) ket pinugsitanna ti rupa ti manokda.
Iti ring, sineniasan ti timer ti sentensiador sa impuestona ti alarma ti dakkel a relona.
“Larga!” kinuna met ti sentensiador a bulonna a pimmanaw iti nagbaetan dagiti agibbet.
Intaray ti handler ni Gino ti manokna iti asideg ti diding sa indissona. Nakatantanang met ni Tobias a nangidisso iti manokna iti abay ti puraw nga uged iti tengnga ti ring. Simrek dagiti handler kadagiti kubongda.
Timmaray ti Meron sa timmayab iti labes ti uged. Nagriaw dagiti agbuybuya.
Ngem saan a simmursot ti Wala. Tinangadna laeng ti kalabanna.
Timmayab manen ti Meron. Kaskasdi a saan a simmurot ti Wala.
“Bagsakan mo, beybi! Bagsakan mo!” inriaw ti handler ti Meron.
“Ilag, nakkong! Umilag ka!” imbales met ni Tobias.
Naglisi met ti Wala ket naipalok ti tadi ti Meron iti daga. Pimmalsiit ti Wala ket nagriaw dagiti dehadista idi maiwekwek ti tadina iti kilikili ti Meron. Napungot met ti Meron ti tengnged ti Wala ket ad-addan ti riaw dagiti agbuybuya idi nagkinnuripaspas dagiti manok.
Kellaat a nagtalna dagiti manok. Nagkinnusay dagitoy, sa naginnibbetda ket napaumel dagiti agbuybuya. Pagam-ammuan, limmagto iti nakangatngato ti Meron sa nagkuripaspas idi nagdisso.
Nagriaw ni Tobias ket inngatona dagiti gemgemna. Timmakder ngamin ti manokna ket maipaspas-iraw nga immaddang.
Uray la nga immayas dagiti tumeng ti sentensiador iti panagdaybna a mangtukma iti Wala. Ngem sakbay a matukmaanna, naidugmam ti manok ket saanen a nagkuti.
Uray no kasta, innala met laeng ti sentensiador dagiti manok sa pinagtinnallikudna dagitoy iti tengnga ti gradas a tanda ti panagtablada.
Kasla nabuttuonan dagiti abaga ni Tobias a nangpidut iti manokna sa darumog a nagturong iti agdan. Kasla awan aniamanna ti pannakatay ti manokda, innala ti handler ni Gino daytoy sa binittatayna iti panagturongna iti agdan.
Agkatkatawa ni Ella a timmakder. “Kuwarta na naging bato pa!” kinunana ket tinurongnan ti ridaw.
Agur-urayen da Elmer ken Dex kasta met da Anding ken ti handler-da, iti sango ti ridaw ti gradas a nadatngan da Ella ken Johnny. Iggem payen ni Dex ti para pasippitda.
“Ni Bitangcol laengen ti karibaltayo!” kinuna ni Ella.
“Yakang yaka, boss!” inrungiit ni Jong.
“Ganun ba?” Kumarkarit ti ayug ni Anding. Kinitana ni Elmer sakbay a simrek.
Sultip ken palakpak ti nangsabat iti entry ni Bitangcol idi mayuli iti gradas. Uray la intakder ni Bitangcol ti nagwagis kas sungbatna kadagiti tao. Ngem di pay nakatugaw, umul-ulin da Ella ken Elmer iti ring ket kasla malbo ti galiera iti pigsa ti dir-i, palakpak, ken dalagudog a naipasabat kadakuada. Iti ringside, timmakder dagiti agabalayan ket indauluanda ti nangidir-i iti nagan ni Ella.
“Ella! Ella! Ella!”
“Siboom, siboom!” insungbat ti dadduma idinto ta inkumpas ti dadduma ti paddakda iti basar.
“Labanan ng mga tigasin ito!” kinuna ti kasador. “Kilala natin sila. Sino ang tatanghaling champion? Malalaman natin pagkaraan ng ilang minuto!” Kinitana ti kuaderno ti para lista. Kinitana dagiti aglaban. Ngem saanen a nasken nga ibagana ti puesto ti tunggal maysa ta addan iti Meron ti manok ni Bitangcol, iti Wala ken ni Ella.
“Kasano, abalayan?” sinaludsod ti napampandek, ngem kumitkita ken ni Ella. Nagtilmon ta kas nasaonan, kasla makakitkita iti naata a mangga no makitana dagiti muldotan a luppo ken lennek a puseg ti Ella.
“Ipustak amin nga inabakko ken ni Ella, ‘balayan!” insungbat ti nakutkuttong. Pinaludipanna laeng dagiti luppo ni Ella ta dina kayat a matiliwan ti abalayanna.
Inasitgan ti kasador ni Anding. “Ito lang ba ang parada ni bossing? Baka nagkamali siya,” kinunana. “Fifty ang pusta ng kabila!”
“Tama ‘yan. Eighty lang kasi mas malaki ang ipupusta sa labas,” insungbat ni Anding.
“Baka magsisi kayo. Tingin ko’y masyado kayong liyamado.”
“Utos ni bossing,” insungbat ni Anding.
Dua laeng a dehadista ti intudo ti kasador, naikasan ti pusta. Ket pimmayso ti kinuna ti kasador. Patas laeng ti pinnusta.
“Meron! Meron! Merooonnn!”
“Wala! Wala! Walaaa!”
Idi agangay, nagbaliw bassit ti innawag.
“Siyam! Siyam! Siyammm!” adda nangyawag a mangisensenias iti tuktokna.
Naipustan ni Dex ti kuartada nga agkakadua ket nakalaglag-an ti riknana a nagtugaw.
Iti puestoda, naipustan dagiti agabalayan ti inabakda ket ipampamaysan ti napampandek a mulmulenglengan ni Ella idinto nga itaktakaw laeng ti nakutkuttong ti panangkitana iti balasang.
Rimmasay ti innawag. Gapu iti daytoy, sineniasan ti timer ti kasador. Insenias met ti sentensiador a maisardengen ti pinnasippit. Immulog metten dagiti miron iti gradas.
“Tanang laeng. Rusher dayta manokda. Idissom iti adayo ti manokmo,” kinuna ni Elmer sakbay a timmallikud. Nagsutsot ni Anding, ngem kasla awan ti nangngegna. Nagpuesto iti agdan.
Pudno ti kinuna ni Elmer. Idi idisson ti handler ni Bitangcol ti manokna iti labes laeng ti puraw nga uged, arintarayen ni Ella a nagpaigid iti diding sa indissona ti manokna. Pinikpikna pay ti ipus ti manok sa siaalisto a nagkamang iti kubongna.
Nagpanerper ti payak ti white chocolate ni Bitangcol. Gimmiddan a rimmasuk ti darisayen ni Ella. Nakita dagiti agbuybuya a nangatngato ti tayab ti manok ni Ella ket rinam-edanna ti kalabanna. Parakapak manipud iti ngato agingga iti baba. Ngem agpada a napakleb dagiti manok a nagdisso.
Nagriaw dagiti tao. Dimmuklos met ti sentensiador ket tinukmaanna ti bukot dagiti manok. Saanen nga agpulsot ti riaw dagiti agbuybuya.
Inkario ti sentensiador dagiti manok. Timmukkaw iti namindua ti manok ni Ella idinto a nagkidem ti manok ni Bitangcol. Gapu itoy, intupak ti sentensiador ti manok ni Bitangcol tapno mariing. Ngem nagbugsot ketdi ket kapilitan nga inibbatan ti sentensiador.
“Yahooo!” indir-i ni Ella a bulonna a rimmuar iti kubongna. Timmaray nga immasideg iti sentensiador idinto ta pinidut ni Elmer ti baina ti tadi iti igid ti diding. Ngem dina pay naisulbong ti baina iti tadi ti manokna, nagbissayot metten ti ulona.
Nakigtot ni Ella. Minulenglenganna ti iggemna a manokna ket timrem ti luana.
Nakagatna ti bibigna.
Nabuak dagiti agraem ken ni Ella. Nagdarisonda iti agdan ti ring. Nagdeppa ti guardia, ngem inwalinda ketdi daytoy. Maysamaysa ti nangdakulap iti balasang.
Saan met a nagpaudi dagiti agabalayan. Nakilinnetletda agingga iti nakaasidegda ken ni Ella a linglingdan ni Elmer.
“Please naman, nakkong. Ilokanokami met. Siak ni Dors ket ni Pons met isuna!” kinuna ti napampandek a kasla sumalto dagiti matana iti panangmulenglengna iti puseg ni Ella. “Kodaktayo man, nakkong!”
“Ala man, nakkong, napia la a pakalaglagipanmi kenka,” kinuna met ti nakutkuttong. Inyawatna ti dekamera a selponna ken ni Elmer. “Piktiurennakami man, boy!”
Nagkusipet ni Elmer. Boy? Ket kinemkemna laengen ti sangina. Nagsanud ket siaalisto met dagiti agabalayan a nangipig ken ni Ella.
Kalpasan ti ababa a seremonia ti panangawat ni Ella iti tropeo ken premiona, kasta met ti pannakaited ti premio ni Elmer a kas labahero ti kampeon, nagdardarasen dagiti dua nga immulog iti gradas. Ngem idi makaruarda, adda nangpaguni ken ni Elmer. Kimmita iti naggapuan ti timek. Ni Anding ken ti nangibbet iti manok ni Bitangcol.
“Mauna ka na at ihanda ang mga gamit,” kinuna ni Elmer ken ni Ella. Sinabatna da Anding.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
