Iti maikatlo nga State of the Nation Address (SONA) ni Presidente Ferdinand R. Marcos Jr. (PBBM) itay Hulio 22, 2024, impakaammona a "manipud ita nga aldaw, maipariten ti operasion dagiti amin a POGO (Philippine Offshore Gaming Operators) iti entero a pagilian."
Binilin ni PBBM ti PAGCOR (Philippine Amusement and Gaming Corporation) a mangipasardeng iti operasion ti POGO agingga iti aggibus ti tawen.
Indeklarar daytoy ni PBBM gapu kadagiti krimen a maar-aramid iti operasion dagiti POGO, nga agpampammarang a kas legal a negosio, ngem naigamer dagiti nadumaduma a krimen a kas iti financial scamming, money laundering, prostitusion, human trafficking, panang-kidnap, nakaro a panagdangran agraman panangpapatay (murder).
Segun ken ni PBBM, nasken a sumardeng dagitoy a panaglabsing iti paglintegan ti Filipinas.
Ruth Padilla, agngayangay a kas Diputado ti Nueva Vizcaya
Binilin ni PBBM ti Department of Labor and Employment (DOLE) a makiuman kadagiti economic manager ti pagilian tapno adda maipaay a panggedan dagiti maapektaran iti panagserra ti POGO.
Gapu iti deklarasionna a maiparit ti POGO iti pagilian, nakagun-od ni PBBM iti standing ovation manipud kadagiti agdengdengngeg iti Batasang Pambansa, ket inyikkisda ti naganna -- "BBM!"
Kadagupanna, natalna ken naurnos ti maikatlo a SONA ni PBBM, segun ken ni Police Maj. Gen. Jose Melencio Nartatez, Jr. (Betheena Unite/Manila Bulletin//Lito Hilidon/Bannawag)
