Indeklarar ti Metro Manila Council (MMC) ken ti Department of the Interior and Local Government (DILG) itay Hulio 24, 2024 a maikabil ti Metro Manila iti State of Calamity gapu iti nakaro a panagtudo nga inyeg ti Bagyo Carina ken ti abagat a nangpataud iti layus iti entero a National Capital Region (NCR).
Babaen daytoy a deklarasion, mapalubosan dagiti naapektaran a local government unit (LGU) a mangusar iti nayon a pondo a nailatang iti panangsaranget iti didigra ken mabalinda nga iparit ti panagipangina iti presio dagiti kangrunaan a magatgatang.
Kinuna ni Presidente Marcos nga itaklinnan kadagiti lokal nga opisial ti panangideklarar iti State of Calamity kadagiti masakupanda ta isuda ti ad-adda a makaammo iti situasion.
Kinuna ni Secretary Amenah F. Pangandaman ti Department of Budget and Management (DBM) nga adda pay PhP11.12 a bilion a calamity fund manipud iti PhP22.736 a nailatang iti daytoy a tawen.
Mangnamnama ni Marcos iti pannakaisubli ti panangipateg ni Pinoy iti arte a Filipino
Manipud iti Enero 2024 agingga iti Hulio 2024, mapanen a PhP11.612 a bilion ti nairuar iti calamity fund.
Iti sabali a bangir, kuna ti Philippine Atmospheric, Geophysical and Astronomical Services Administration (PAGASA) a pumigpigsa ti Bagyo Carina iti panagturongna idiay Taiwan ket manamnama a mapasaran ti akindaya a paset ti Luzon ti kalalainganna agingga iti napigsa a tudo agingga iti Biernes, Hulio 26, ket mapakpakdaaran ti publiko iti posible a panaglayus. (Patrick Garcia/Manila Bulletin//Lito Hilidon/Bannawag)
