Kalpasan a makitana ti epekto ti Bagyo Carina ken napapigsa nga abagat iti nadumaduma a paset ti Luzon, impaganetget ni Presidente Ferdinand R. Marcos Jr. (PBBM) a masapul ti nailian a plano iti panangkontrol iti layus.
Iti situation briefing a naangay iti Quezon Province itay Hulio 26, 2024, imbatad ni PBBM a mabalin a malayus ti ania man a lugar, isu a masapul ti nailian a plano iti panangkontrol iti layus.
Kinuna ni PBBM a nagbalbaliwen ti kasasaad ti pannakalayus ti pagilian, ta dagiti lugar a saan a malaylayus idi, ket malaylayus itan. Innayonna pay a masapul nga ammuen ti paggapuan ken pagturongan ti danum.
Iti sabali a bangir, binabalaw ni Senador Grace Poe ti kumarkaro a pannakalayus ti Metro Manila, idinto a dakkel ti pondo a mailatlatang kadagiti proyekto para iti flood-control.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna ni Poe nga agdalan iti abut ti dagum ti pannakatingiting ti badiet para iti flood-control project ti Department of Public Works and Highways (DPWH) ken dagiti dadduma pay nga ahensia.
Kinuna ni Senador Joel Villanueva nga iwayat ti Senado ti imbestigasion maipapan iti daytoy.
Iti sabali a bangir, kinuna met ni House Speaker Martin Romualdez nga adda nabukelen a flood control management plan iti Metro Manila, ket masapul a suroten, pabaruen, ken ipatungpal daytoy.
Segun ken ni Romualdez, masapul a mairaman iti masterplan ti pannakayallatiw dagiti agnanaed iti nababa a lugar, kas iti San Juan City ken Marikina City.
Inanamongan met ni Romualdez ti gandat ti Senado a mangimbestigar iti makaigapu iti nakaro a panaglayus tapno masinunuo nga umno ti pannakaaramat iti pondo para iti flood-control. (Betheena Unite/Manila Bulletin//Lito Hilidon/Bannawag)
