Inyarig ni Secretary of Defense ti Estados Unidos (US) Lloyd Austin III ti relasion ti Filipinas ken US a kas maysa a pamilia ket binigbigna ti pannakapatibker ti aliansa ti dua a pagilian kadagiti naglabas a tawtawen.
Kadua ni Austin ni US Secretary of State Antony Blinken a simmarungkar iti Malakanyang ita, Hulio 30, 2024.
Pinasangbay ni Presidente Ferdinand R. Marcos Jr. dagiti dua nga opisial ti US para iti 4th Philippines-US Foreign and Defense Ministerial (2+2) Dialogue.
Mairaman iti taripnong da Secretary ti Department of National Defense Gilberto Teodoro Jr. ken Secretary ti Department of Foreign Affairs Enrique Manalo.
Mangnamnama ni Marcos iti pannakaisubli ti panangipateg ni Pinoy iti arte a Filipino
Segun iti DFA, pagsasaritaan dagiti uppat a sekretario ti pannakapatibker iti panagkadua ti Filipinas ken US ket mangbukelda iti programa a mangsuportar iti maibasar-linteg a panagdur-as, agraman ti pannakarisut ti lumanlanlan a parikut iti seguridad iti rehion.
Kinuna ni Austin a saan laeng a kaaliado, no di ket pamilia, ti pangibilangan ti US iti Filipinas, ta agpadada ti interes ken prinsipio ket adun ti nagapuananda a mangpatibker iti aliansada iti las-ud ti nasurok a tallo a tawen.
Daytoy a taripnong ket paset ti panangpapigsa ti Filipinas iti panangdepensana babaen ti tulong dagiti kaaliado a pagilian kas iti Japan ken US. (Raymund Antonio/Manila Bulletin//Lito Hilidon/Bannawag)
