Simmanglad iti Port Area, Manila ita, Hulio 5, 2024, ti Vietnam Coast Guard (VCG) para iti joint exercise ti coast guard nga insayangkat ti Vietnam ken Filipinas.
Indauluan ni Colonel Hoang Quoc Dat, VCG Region 2 vice commander, ti 80 a kameng ti patrol ship ti VCG a Canh Sat Bien (CSB)-8002.
Pinasangbay ida dagiti kameng ti Philippine Coast Guard (PCG) nga idadauluan ni Commo. Arnaldo M. Lim, Direktor ti Coast Guard Strategic Studies and International Affairs Center, a nangibagi ken ni PCG Commandant Admiral Ronnie Gil Gavan.
Inlaksid pay laeng ti Vietnam ken Filipinas ti territorial claim-da tapno mapatibker ti panagtinnulongda iti baybay.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna ni Colonel Hoang a pasayaaten ti joint exercise ti panagtinnulong ken panagbinninglay iti impormasion ti Vietnam ken Filipinas iti panangipatungpal iti linteg ti baybay kas mayanatup iti internasional a linteg, tapno agtalinaed ti talna ken seguridad iti rehion.
Agpaut ti panagsanayda agingga inton Agosto 9.
Bayat ti isasarungkar ni Presidente Marcos Jr. sadiay Hanoi, Vietnam idi arinunos ti Enero, 2024, nagpirma ti PCG ken VCG iti katulagan a buklenda ti Joint Coast Guard Committee (JCGC) a mangtaming iti agpada nga interes ken parikut dagiti dua a pagilian. (Martin Sadongdong/Manila Bulletin//Lito Hilidon/Bannawag)
