Ngimmato ti presio dagiti magatgatang iti 4.4 a porsiento idi Hulio, ket nalab-siwanna ti puntiria ti gobierno iti umuna a gundaway, gapu iti napartak nga ingingina ti utilidad (bayad iti koriente ken danum), taraon, ken transportasion.
Mairaman kadagiti kangrunaan a nakaigapuan ti implasion iti Hulio ket ti gastos iti panagpabalay wenno upa iti balay, danum, koriente, gas, ken dadduma pay a produkto ti petroleo (0.1% agingga 2.3%) taraon ken saan nga alkoholiko nga inumen (6.1% agingga 6.4%); ken transportasion (3.1% agingga 3.6%).
Iti sabali a bangir, kinuna ti Philippine Statistics Authority (PSA) a ti bagas latta ti kangrunaan a makaigapu iti implasion, nupay bimmaba daytoy iti 20.9 a porsiento manipud iti 22.5 a porsiento idi Hunio.
Kinuna ni Undersecretary ti PSA Claire Dennis S. Mapa a bimmaba ti presio dagiti klase ti bagas a sipsiputanda ti presiona, kas iti regular ti pannakakiskisna (regular milled) a nagbalin a PhP50.90 manipud iti PhP51.10 idi Hunio.
Mangnamnama ni Marcos iti pannakaisubli ti panangipateg ni Pinoy iti arte a Filipino
Nagbalin met a PhP55.85 ti well-milled a bagas manipud iti PhP55.96; idinto a nagbalin a PHP64.42 ti special rice manipud iti PhP64.56.
Impanamnama ni Secretary ti National Economic and Development Authority (NEDA) Arsenio M. Balisacan nga ipatungpal ti gobierno dagiti addang tapno mapatalged ti presio dagiti produkto ken mapababa ti implasion. (Xander Dave Ceballos/Manila Bulletin//Lito Hilidon/Bannawag)
