Kiniddaw ni Chairperson ti Basic Education Committee, Diputado ti Pasig Roman Romulo iti Department of Education (DepEd) a marepaso koma ti nailatang nga oras iti tunggal subject ti “Matatag Curriculum," ta naipadamag a pinaadu daytoy ti trabaho dagiti mannursuro.
Kinuna ni Dip. Romulo iti naangay a Bagong Pilipinas Ngayon briefing itay Hulio 7, 2024, nga adda dagiti subject a kasapulan nga isuro iti inaldaw, wenno maminlima iti makalawas.
Segun iti DepEd Order (DO) No. 10, a mangsakup iti pannakaipatungpal ti Matatag Curriculum, 45 a minutos ti mailatang iti subject a Filipino, English, Mathematics, Science ken Araling Panlipunan, maminlima iti makalawas, manipud iti Grado 4 agingga Grado 6.
Mailatang met ti 40 agingga 45 a minutos iti inaldaw kadagiti subject a Filipino, English, Mathematics, Makabansa, Science, kndp kadagiti adda iti Grado 1 agingga 3.
Mangnamnama ni Marcos iti pannakaisubli ti panangipateg ni Pinoy iti arte a Filipino
Segun ken ni Romulo, mabalin a mangted iti pisikal, mental wenno emosional a nga stress ti naikeddeng nga oras kadagiti mannursuro, idinto a saan met nga inaldaw a maisuro dagitoy iti awan pay ti Matatag Curriculum.
Malaksid kadaytoy, insingasing pay ni Romulo nga amirisen koma ti DepEd ti workload dagiti mannursuro, nangruna dagiti ag-double shift iti agsapa ken malem a klase.
Masapul a kitaen dagitoy di la ket ta maisalungasing iti magna carta for public school teachers, a mangiparparit iti panagtalinaed ti mannursuro iti eskuela iti nasurok a walo nga oras.
Kinuna ni Romulo a kiddawenna iti DepEd nga adalenda dagitoy a paliiwna. (Filane Mikee Cervantes/Manila Bulletin//Lito Hilidon/Bannawag)
