Impaulog ti Court of Appeals (CA) ti Freeze Order kadagiti bank account, dagdaga, ken sanikua a naipanagan iti Kingdom of Jesus Christ (KOJC) ken iti pundador daytoy a ni Pastor Apollo C. Quiboloy, ti Swara Sug Media Corporation (SSMC), ken dadduma pay a personalidad.
Nairuar daytoy a bilin gapu iti petision nga impila ti Anti-Money Laundering Council (AMLC).
Nairaman iti Freeze Order (FO) ti 10 a personal a bank account ni Quiboloy; 47 a bank account a naipanagan iti KOJC; 23 a bank account a naipanagan iti Children’s Joy Foundation, Inc. -- maysa a gunglo a nakabase iti uneg ti KOJC compound iti Davao City; 17 a bank account a naipanagan iti SSMC (SMNI); ken 76 a bank account a naipanagan kadagiti tao a nasinged ken ni Quiboloy.
Nairaman met iti FO dagiti dagdaga ken lima a lugan a nairehistro iti nagan ni Quiboloy, kasta met dagiti 16 a lugan ken 16 a dagdaga a naipanagan iti KOJC nga adda sadiay Laguna, Davao Oriental, Iloilo, Iloilo, Butuan City, Mandaue City, Tagbilaran City, Davao del Norte, Davao City, Pasay City ken Quezon City.
Mangnamnama ni Marcos iti pannakaisubli ti panangipateg ni Pinoy iti arte a Filipino
Binilin ti CA dagiti banko ken ahensia ti gobierno a maikabil ti Freeze Order kadagiti titulo ken rehistro dagiti nadakamat a sanikua, luglugan ken eroplano.
Segun iti CA, naipaulog ti 20-aldaw a Freeze Order tapno saan a makuti wenno mailemmeng dagiti pondo kadagiti nadakamat a bank account, kas kiniddaw ti AMLC.
Ti AMLC ti nagkiddaw iti Freeze Order kadagiti sanikua ni Quiboloy gapu kadagiti naipila a kaso a kriminal kas iti qualified human trafficking, sexual abuse, conspiracy to engage sex trafficking by force, fraud and coercion; conspiracy; marriage fraud; fraud and misuse of visas; bulk cash smuggling, promotional money laundering; concealment money laundering; ken international promotional money laundering (kas paglintegan ti Estados Unidos).
Nupay addan arrest order nga impaulog dagiti dua a Regional Trial Court (RTC), agwaywayas latta ni Quiboloy ken dagiti kakaduana a naidarum.
Iti sabali a bangir, imbatad ni Police Brig. Gen. Nicolas Torre III, direktor ti PNP Regional Office 11, itay Agosto 8, 2024, nga ammoda nga aglemlemmeng laeng ni Quiboloy iti 30-ektaria a daga ti KOJC iti Barangay Buhangin, Davao City.
Segun kadagiti informant ti PNP, adda ni Quiboloy iti uneg ti KOJC ket bambantayan isuna dagiti kameng ti KOJC.
Inlawlawag ni Torre a mabalinda met latta a puersaen a serken ti KOJC ngem pampanunotenda met ti kinatalged dagiti pasurot ni Quiboloy.
Innayon pay ni Torre nga agsapsapulda iti pamuspusan tapno matiliwda ni Quiboloy nga awan ti kinaranggas. (Rey G. Panaligan/Manila Bulletin//Lito Hilidon/Bannawag)
