Kinondenar ni Presidente Ferdinand R. Marcos Jr. (PBBM) itay Agosto 11, 2024 ti di nainkalintegan, ilegal, ken dinadarasudos nga aramid ti China iti tangatang ti Bajo de Masinloc (Scarborough Shoal) a paset ti West Philippine Sea (WPS).
Idi Agosto 8, impakaammo ni Chief ti Armed Forces of the Philippines (AFP) Gen. Romeo Brawner Jr. ti panangriribuk ti People’s Liberation Army Air Force (PLAAF) ti China iti eroplano ti Filipinas a nagpatrolia iti Bajo de Masinloc (BdM).
Segun ken ni Brawner, napeggad ti panagtignay dagiti dua nga eroplano ti PLAAF maibusor iti Philippine Air Force (PAF) NC-212i nga agpatpatrolia iti tangatang ti BdM, ken nangitinnag kadagiti flare iti dalan ti NC-212i.
Itay Agosto 11, binabalaw ni PBBM ti panangriribuk ken pananggargari nga inaramid ti China idinto a gagangay a panagpatrolia ti insayangkat ti PAF iti tangatang a sakup ti Filipinas.
Mangnamnama ni Marcos iti pannakaisubli ti panangipateg ni Pinoy iti arte a Filipino
Inyebkas met ni PBBM ti panangandingayna kadagiti maingel a kameng ti AFP, kangrunaan iti PAF.
Dinagadag ni PBBM ti China nga ipakita koma daytoy a kabaelanna ti agtignay a responsable iti taaw man wenno iti tangatang. (Darryl John Esguerra/PNA//Lito Hilidon/Bannawag)
