Kiniddaw ni AGRI Party-list Diputado (Dip.) Wilbert Lee a maisubli koma ti dati a badiet ti Department of Agriculture (DA) para iti 2025, nga aggatad iti PhP513.8 a bilion.
Iti naangay a budget briefing ti House Committee on Appropriations itay Agosto 12, 2024, kiniddaw ni Dip. Lee a manayonan koma ti badiet ti DA nga insingasing ti Department of Budget and Management (DBM) a PhP200.2 a bilion.
Segun ken ni Diputado Lee, PhP513-bilion ti badiet a dawdawaten ni Secretary ti DA Francisco Tiu Laurel Jr., ngem PhP200 a bilion laeng ti ipaay ti DBM, ket dakkel ti diperensia daytoy.
Innayon ni Lee a saan a maipababa ti presio ti taraon no agkurang ti mailatang a pondo para iti agrikultura.
COC ni Doc Willie Ong a para senador, impila ti asawana
Kinuna ni Lee a no pudno nga ipangpangruna ti gobierno ti agrikultura, masapul a nayonan ti badiet ti ahensia tapno maipangato ti produksion ti agrikultura ken maipababa ti presio ti taraon.
Inanamongan met daytoy da Diputado Antonio Albano (Isabela), Luis Raymund Villafuerte Jr. (Camarines Sur), ken Jose Teves Jr. (TGP Party-list).
Iti sabali a bangir, impasingked ni Secretary Laurel a masapul ti dakkel a puonan iti agrikultura tapno matungpal ti kari ti administrasion ni Presidente Marcos a "Masaganang Bagong Pilipinas." (Filane Mikee Cervantes/PNA//Lito Hilidon/Bannawag)
