Kalpasan ti pannakaipadamag ti pannakaibelleng dagiti apit a bunga ti kamatis iti Nueva Vizcaya, kinuna ti Department of Agriculture (DA) ita, Agosto 14, 2024, a makium-umandan iti regional office tapno malapdan ti pannakaibelleng dagiti kamatis.
Kinuna ni Assistant Secretary ti DA Arnel De Mesa a kasarsaritadan dagiti regional office ti Cordillera Administrative Region (CAR) ken Region II (Cagayan Valley) a kitaenda no ania ti rumbeng nga aramidenda iti aglaplapusanan nga apit a kamatis.
Kinuna pay ni De Mesa a mabalinda nga ipan dagiti kamatis kadagiti Kadiwa wenno tiendaan iti Metro Manila babaen ti itutulongda iti pannakaibiahe dagiti apit a kamatis.
Malaksid iti CAR ken Cagayan Valley, adu met ti naapit a kamatis iti Central Luzon ken CALABARZON.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna met ni Chairperson ti Samahang Industriya ng Agrikultura (SINAG) Rosendo So a nasken a mapasayaat ti koordinasion ti DA ken dagiti kooperatiba dagiti mannalon.
Innayon ni So a mabalin a lumaka koma ti kamatis gapu iti kaadu dagiti naapit. Dinakamatna nga iti napalabas a bulan ti Hulio, dimmanon pay agingga iti PhP220 ti sangakilo iti Kamanilaan.
Kinuna met ni De Mesa nga iti agdama, mailaklako ti kamatis iti Kamanilaan iti PhP60 agingga PhP80 kada kilo.
Segun met iti Bantay Presyo ti DA, PHP60 agingga PhP130 ti kada kilo ti kamatis iti Metro Manila.
Impaganetget ni De Mesa a nasken a maipatakder iti kabiitan a panawen dagiti agrikultural nga empraestruktura a kas kadagiti pasilidad iti cold storage ken post-harvest tapno marisut dagiti kakastoy a parikut iti tiempo ti panagaapit. (Stephanie Sevillano/PNA//Lito Hilidon/Bannawag)
