Nagprotesta ti gobierno ti Filipinas maibusor iti inaramid ti China a panangibulos iti flare iti dalan ti eroplano ti Philippine Air Force (PAF) a nagpatrulia iti West Philippine Sea (WPS).
Kinompirma ni pannakangiwat ti Department of Foreign Affairs (DFA) Ma. Teresita Daza itay Agosto 13, 2024 a nangidatagen ti DFA iti diplomatic protest maibusor iti China.
Binabalaw ni Presidente Marcos Jr. ti di nainkalintegan, ilegal ken dinadarasudos nga aramid ti People’s Liberation Army Air Force (PLAAF) ti China.
Segun ken ni Secretary ti DFA Enrique Manalo, naipila ti protesta babaen ti note verbale.
COC ni Doc Willie Ong a para senador, impila ti asawana
Kinuna ni Manalo nga awan ti linabsing dagiti PAF ta addada iti masakupan ti Filipinas idinto a dagiti puersa ti PLAAF ti simrek iti tangatang a sakup ti Filipinas.
Insungbat ni pannakangiwat ti China Foreign Ministry Lin Jian itay Agosto 13, a namindua kano a nagbasak ti eroplano ti Filipinas iti tangatang ti Huangyan Dao idi Agosto 7 ken Agosto 8, ket linabsingda ti kinasoberano ti China ken iti internasional a paglintegan.
Impetteng ti China a maysa a pananggargari ti kaadda ti PAF iti Scarborough Shoal. (Joseph Pedrajas/Manila Bulletin//Lito Hilidon/Bannawag)
