Inaprobaran ni Presidente Ferdinand R. Marcos Jr. (PBBM) ti pannakabukel iti maysa a Cabinet cluster a mangtaming iti krisis ti edukasion iti pagilian.
Iti sectoral meeting a naangay itay Agosto 13, 2024, naaprobaran ti singasing ti Second Congressional Commission on Education (EDCOM 2) a mabukel koma ti maysa a Cabinet Cluster for Education a mangimaton kadagiti amin nga ahensia iti edukasion nga adda iti sidong ti Executive Department.
Sakbay daytoy, dagiti Commissioner ti EDCOM 2 a da Senador Sherwin “Win” Gatchalian, Alan Peter Cayetano, Koko Pimentel III, ken Joel Villanueva ket nangidatag iti Senate Concurrent Resolution No. 21, a mangidagadag ken ni Presidente Marcos a mangbukel iti Cabinet Cluster para iti Edukasion
Ngem inlawlawag ni Executive Director ti EDCOM 2 Karol Mark Yee a nupay ti Department of Education (DepEd) ti akinkarbengan iti panangrisut iti parikut iti edukasion, saan a kabaelan ti DepEd a solbaren dagiti parikut a bukbukodna, ket masapul ti tulong dagiti nadumaduma nga ahensia.
Mangnamnama ni Marcos iti pannakaisubli ti panangipateg ni Pinoy iti arte a Filipino
Gandat ti Cabinet Cluster for Education a mangbukel iti "10-year integrated National Education and Workforce Development Plan" a mangtaming kadagiti naruay a parikut ti sektor ti edukasion.
Segun ken ni Secretary ti DepEd Sonny Angara, buklen ti Cabinet Cluster for Education dagiti ahensia a kas iti DepEd, Commission on Higher Education (CHED), Technical Education and Skills Development Authority (TESDA), Department of Labor and Employment (DOLE), ken ti Department of Budget and Management (DBM).
Inanamongan met daytoy ti Department of Science and Technology (DOST), Coordinating Councils for Private Education Associations (COCOPEA), Technical Vocational School Associations of the Philippines (TVSA), ken dagiti adda iti pribado nga edukasion, agraman ti Bangsamoro Autonomous Region in Muslim Mindanao (BARMM). (Raymund Antonio/Manila Bulletin//Lito Hilidon/Bannawag)
