Inlawlawag ni Secretary ti Department of the Interior and Local Government (DILG) Benjamin “Benhur” Abalos Jr. a saan nga ar-aramiden ti Philippine National Police (PNP) ti "red-tagging" iti sidong ti administrasion ni Presidente Marcos Jr.
Ti red-tagging ket ti panangmarka kadagiti indibidual wenno organisasion a kas komunista, rebelde, wenno terorista.
Iti budget hearing ti DILG ita, Agosto 15, 2024, dinakamat ni Kabataan Party-list Dip. Raoul Manuel ti red-tagging monitoring project ti Ateneo Human Rights Center (AHRC).
Natakuatan a kaaduan a naaramid a red-tagging ket naggapu kadagiti kameng ti gobierno.
COC ni Doc Willie Ong a para senador, impila ti asawana
Ngem kinuna ni Sec. Abalos a saan a polisia ti PNP ti red-tagging, ket adalenda ti nadakamat a sukisok ti Ateneo.
Kinuna ni hepe ti PNP General Rommel Marbil a sursuroten dagiti kameng ti PNP ti bilin ni Presidente Marcos Jr. nga isardengda ti red-tagging.
Innayon ni Marbil nga awan ti insidente ti red-tagging iti PNP, ta salungasingen daytoy ti karbengan ti tao.
Iti kallabes, indeklarar ti Korte Suprema a ti red-tagging ket maysa a pangta iti karbengan ti tao iti biag, panagwaywayas, ken kinatalged.
Manipud Enero agingga Hunio, 2024 addan nairekord ti AHRC nga 456 a kaso ti red-tagging. (Dexter Barro II/Manila Bulletin//Lito Hilidon/Bannawag)
