Imbatad ni Senador Risa Hontiveros ita, Agosto 19, 2024, a nakapanawen iti Filipinas ni nasuspende a Mayor ti Bamban, Tarlac Alice Guo.
Segun ken ni Senador Hontiveros, adda naawatna nga impormasion a napanen ni Guo iti Kuala Lumpur, Malaysia idi Agosto 18.
Iti Facebook Page ni Senador Hontiveros, imparangna dagiti dokumento a mangipakpakita iti detalye ti ipapanaw ni Guo iti pagilian.
Innayon ni Hontiveros nga immuna a nagturong ni Guo idiay Singapore ket nagsasarakda sadiay kadagiti nagannak kenkuana a da Lin Wen Yi ken Guo JianZhong.
Mangnamnama ni Marcos iti pannakaisubli ti panangipateg ni Pinoy iti arte a Filipino
Inimtuod ni Hontiveros kadagiti opisial ti gobierno no asino ti nangipalubos a makaruar ni Guo iti pagilian.
Kinuna ni Hontiveros a sakbayna, inkari kenkuana ti Bureau of Immigration (BI) a saanda a baybay-an a makaruar ni Guo iti Filipinas.
Kinuna pay ti senador a no di makaaramid ti gobierno iti pamuspusan, arigna maulit-ulit a tungpatungpaennatayo dagiti ganggannaet iti maulit-ulit a pananglablabsingda kadagiti linteg ken proseso ti pagilian. (Mary Joy Salcedo/Balita//Lito Hilidon/Bannawag)
