Simged manen ti tension iti West Philippine Sea (WPS) kalpasan ti panagdinnungpar dagiti barko ti Philippine Coast Guard (PCG) ken China Coast Guard (CCG) iti Escoda (Sabina) Shoal ita, Agosto 19, 2024.
Agturong dagiti barko ti PCG a BRP Bagacay (MRRV-4410) ken BRP Cape Engaño (MRRV-4411) iti Patag (Flat) Island ken Lawak (Nanshan) Island tapno mangitulod iti abasto dagiti soldado nga agbambantay sadiay, ngem naipasangoda iti di nainkalintegan ken naranggas a panagmaniobra ti barko ti CCG, segun iti National Task Force for the West Philippine Sea (NTF-WPS).
Dagiti Isla ti Patag ken Lawak ti dua kadagiti siam a paset ti baybay a masakupan ti Filipinas iti Spratly Islands.
Immuna a nakasagrap iti agresibo a panangmaniobra ti BRP Cape Engaño a sinalangad ti barko ti CCG nga addaan iti tail number 3104, a gapuanan ti pannakadungpar ti starboard beam ket nangparnuay iti abut iti sango ti barko.
Kompania a paset ti Miru Joint Venture para iti 2025 Election, nagbabawi
Maikadua ti BRP Bagacay a namindua a dinungpar ti barko ti CCG nga addan iti numero a 21551, a nangdadael iti starboard side ti barko.
Iti laksid daytoy, nagtuloy latta dagiti barko ti PCG iti misionda a mangitulod iti abasto dagiti taoda nga agbambantay iti Isla ti Patag ken Lawak.
Iti sabali a bangir, inkalintegan ti China ti inaramid ti CCG ta ilegal kano ti iseserrek ti BRP Macagay iti baybay nga asideg ti "Xianbin Jiao" (Escoda Shoal), ken dida panangikankano iti pakdaar ti China.
Inrason pay ti China a ti Filipinas ti nanggargari ken nanglabsing iti katulagan mainaig iti panangipaay iti suplay iti barko nga ilegal a nakasanglad iti Ren'ai Reef ti China.
Iti napalabas a bulan, binukel ti China ken Filipinas ti katulagan iti panangipaay iti suplay iti BRP Sierra Madre iti Ayungin Shoal kas panangtaming iti situasion iti WPS.
Idi Agosto 8, dua nga eroplano ti China ti nangsinga ken nagitinnag iti flare iti dalan ti eroplano ti Philippine Air Force (PAF) bayat ti panagpatruliada iti Bajo de Masinloc (Scarborough Shoal). (Martin Sadongdong/Manila Bulletin//Lito Hilidon/Bannawag)
