Inlawlawag ni Secretary ti Department of Science and Technology (DOST) Renato Solidum itay Agosto 19, 2024 a ti angep a nangbalkot iti Metro Manila ket saan a gapuanan ti aktibidad ti Bulkan Taal.
Kinuna ni Secretary Solidum a nupay nagsaknap iti dadduma a paset ti Batangas ti volcanic smog (wenno "vog") manipud iti Bulkan Taal, saan nga inapektaran daytoy ti Metro Manila.
Segun iti Department of Environment and Natural Resources-Environmental Management Bureau (DENR-EMB), ti naangep a tangatang iti Metro Manila ket gapuanan ti polusion iti angin manipud kadagiti ipugpugso dagiti lugan.
Kinuna ti Philippine Institute of Volcanology and Seismology (Phivolcs) a ti nabuntog unay nga angin iti Luzon ti makaigapu ti panagsaknap ti "angep" iti Metro Manila ken ti vog iti Taal.
COC ni Doc Willie Ong a para senador, impila ti asawana
Innayon ti Phivolcs a ti nabuntog nga angin ti manglapped kadagiti rugit a maiwaras iti tangatang, ket agtalinaedda iti nababbaba a paset, a mangparnuay iti kasla angep.
Kinuna ni Direktor ti Phivolcs Teresito Bacolcol a dagiti lugar iti asideg ti Bulkan Taal ti kangrunaan a naapektaran ti vog, agraman dagiti paset ti Batangas, kas iti Laurel, Tuy, Calaca, San Luis, Lemery, Balayan, Talisay, Agoncillo, San Nicolas, Balete, Sta. Teresita, Malvar, Alitagtag, ken Batangas City. Ngem no agbaliw ti turongen ti angin, ket agpaamianan, mabalin a dumanon ti vog iti Kamanilaan. (Ellalyn De Vera-Ruiz/Manila Bulletin//Lito Hilidon/Bannawag)
