Isagsagana ti Filipinas ti diplomatic protest a maidatag kontra iti China kalpasan ti panangdungpar ken panangdadael daytoy iti dua a barko ti Philippine Coast Guard (PCG) iti Escoda Shoal a paset ti Exclusive Economic Zone (EEZ) ti Filipinas.
Daytoy ti imbatad ni Presidential Assistant on Maritime Concerns Andres Centino itay Agosto 20, 2024.
Kinuna ni Centino a naibilin iti PCG nga urnongenda amin nga ebidensia ken umno a dokumentasion para iti posible a pannakaipila ti protesta babaen ti Department of Foriegn Affairs (DFA).
Kinanunongan met daytoy ni pannakangiwat ti National Maritime Council (NMC) Alexander Lopez.
COC ni Doc Willie Ong a para senador, impila ti asawana
Segun ken ni Lopez, sinupiat ti NMC ti imbaga ti China a dagiti dua a barko ti PCG -- ti BRP Bagacay (MRRV-4410) ken ti BRP Cape Engaño (MRRV-4411) -- ti nangdungpar iti barko ti Chinese Coast Guard (CCG).
Inyebkas ti NMC ti pannakaseknanna iti inggagara a panangriribuk ken pananglabsing ti China iti kalintegan ti Filipinas a kas pagilian, ken iti kalintegan ken hurisdiksion daytoy iti West Philippine Sea.
Impetteng ti China a kukuana ti entero a South China Sea, agraman ti baybay nga adda iti EEZ ti Filipinas, ket inlaksidna ti 2016 Arbitral Tribunal Ruling a nangwaswas iti panangtagikua ti China iti entero a "South China Sea." (Raymund Antonio/Manila Bulletin//Lito Hilidon/Bannawag)
