'Agtulid dagiti ulo.' Dayta ti imbatad ni Presidente Ferdinand R. Marcos Jr., a kas panangpasingkedna a madusa dagiti adda pakainaiganna iti mapapati a panaglibas ti napadisi a mayor ti Bamban, Tarlac a ni Alice Guo. Madama pay laeng ti maisaysayangkat nga imbestigasion iti pannakairaman ni Guo iti operasion ti Philippine Offshore Gaming Operators (POGO) iti pagilian.
Itay Agosto 19, imbutaktak ni Senador Risa Hontiveros a nakapanawen ni Guo (a naammuan nga agnagan pay iti Guo Hua Ping) iti Filipinas idi pay laeng Hulio 18 ket mapapati nga addan daytoy idiay Indonesia.
Segun ken ni Senador Hontiveros, inusar ni Guo ti Philippine passport-na a rimmuar iti pagilian idi Hulio 18 ket napan iti Kuala Lumpur, Malaysia, sa kalpasanna, nagsasarakda iti pamilia daytoy idiay Singapore, sa nagturongda iti Indonesia.
Kinuna ni Marcos a mangiwayat ti gobierno iti naan-anay nga imbestigasion tapno maammuan ti pudno, ket maiparang dagiti naglabsing a nangdadael iti panagtalek ti tao ken timmulong iti panaglibas ni Guo.
COC ni Doc Willie Ong a para senador, impila ti asawana
Itay Agosto 20, winaswas ti Department of Foreign Affairs (DFA) ti pasaporte ni Guo, agraman ti pasaporte dagiti kakabsatna a da Wesley Leal Guo ken Sheila Leal Guo, ken ti maysa nga agnagan iti Cassandra Li Ong. (Argyll Cyrus Geducos/Manila Bulletin//Lito Hilidon/Bannawag)
