Agtultuloy latta ti panangsawar dagiti kameng ti polisia iti sakup a daga ti Kingdom of Jesus Christ (KOJC) sadiay Davao City tapno ipaayda ti warrant of arrest ken ni Apollo Quiboloy iti laksid ti Temporary Protection Order (TPO) nga impaulog ti lokal a korte.
Itay Agosto 27, 2024, rimmuar ti TPO manipud ken ni Presiding Judge ti Davao City Regional Trial Court (RTC) Branch 15 Mario Duaves nga agbilbilin a maikkat koma amin a bangen, wenno ania man a makalapped iti panagserrek dagiti kameng ti KOJC iti daga a sakup ti KOJC.
Inlawlawag ni Secretary ti Department of the Interior and Local Government (DILG) Benjamin “Benhur” Abalos Jr. a ti laeng pannakaikkat kadagiti bangen iti daga wenno lote ti KOJC ti maikkat, ket tungpalenda daytoy a bilin ti TPO.
Ngem kinuna ni Abalos a saan nga ipasardeng ti korte ti operasion ti Philippine National Police (PNP) a panangsapul ken ni Quiboloy ken iti panangsawarda iti lote ti KOJC a nangrugi idi Sabado.
COC ni Doc Willie Ong a para senador, impila ti asawana
Segun iti Korte Suprema, saan a waswasen ti TPO ti warrant of arrest nga inruar ti korte maibusor ken ni Quiboloy.
Inkalintegan ni Presidente Marcos Jr. (PBBM) a kasapulan ti rinibu a polis iti panangbirok ken panangtiliwda ken ni Quiboloy gapu iti kalawa ti daga a sakup ti KOJC a mapan a 30-ektaria.
Kinuna ni PBBM a saan a linabsing dagiti polis ti kalintegan ni Quiboloy wenno dagiti pasurotna.
Innayon ni PBBM a saan koma a rumbeng nga iraman ni Quiboloy dagiti pasurotna iti KOJC a mangilemmeng kenkuana kadagiti pannakabalin ti linteg. (Betheena Unite/Manila Bulletin//Lito Hilidon/Bannawag)
