Saan a pinatgan ti gobierno ti Timor-Leste ti kiddaw ni dati a Diputado ti Negros Oriental 3rd District Arnolfo Teves mainaig iti ekstradision daytoy iti Filipinas, segun iti Department of Justice (DOJ) idi Agosto 28, 2024.
Imbatad ti DOH a naawat daytoy ti kaudian a pakaammo manipud iti Prosecutor General ti Timor-Leste maipapan iti motion for reconsideration nga impila ni Teves iti Court of Appeals (CA) ti Timor-Leste.
Saan a pinatgan ti CA ti kiddaw ni Teves a baliwan ti korte ti immuna a desision daytoy iti ekstradision ni Teves.
Idi Hunio 27, pinatgan ti Timor-Leste ti kiddaw ti gobierno ti Filipinas a pagawidenda ni Teves tapno sanguenna dagiti kasona iti Filipinas, ngem nangipila daytoy iti motion for reconsideration.
Mangnamnama ni Marcos iti pannakaisubli ti panangipateg ni Pinoy iti arte a Filipino
Naidarum ni Teves iti 10 a kaso ti murder, 12 a kaso ti frustrated murder, ken uppat a kaso ti attempted murder iti Manila Regional Trial Court Branch 51 gapu iti pannakapaltog idi Marso 4, 2023 idiay Pamplona, Negros Oriental a nangitunda iti pannakapapatay ni Gobernador Roel Degamo ken dagiti siam a kakaduana.
Nagkamang ni Teves iti Dili, Timor-Leste ket nagkiddaw iti political asylum, ngem saan a napatgan daytoy.
Idi Marso 21, tiniliw dagiti polis ti Timor-Leste ni Teves sadiay Dili, gapu iti red notice nga impaulog ti International Criminal Police Organization (Interpol).
Segun iti DOJ, sisasaganda a mangibaon iti taoda a mangsukon ken ni Teves iti Timor-Leste tapno maisubli daytoy iti Filipinas. (Benjamin Pulta/PNA//Lito Hilidon/Bannawag)
